WAINHIRA ITA MATE LA’OS HOTU ONA

 

DOMINGO BA DALA LIMA TEMPU QUARESMA

 

1a. Leitura: Ez 37:12-14

2a. Leitura:  Rom 8:8-11

Evanjelho: Jo. 11:1-45

 

Ita besik ona tama semana santa, ita nota katak leituras ba domingo ida ne’e nian nakonu ho moris liu husi mate”Vida sobre a morte”

Profeta Ezekiel dehan: Ha’u sei loke imi nia rate sira no sei halo imi sai husi sira Ha’u povo no Ha’u sei hatama fali Ha’u Espiritu iha imi, no imi sei moris.

Saun Paulo dehan ba sarani sira iha Roma no ba ita hotu: “Imi iha espiritu wainhira Maromak Nia Espiritu horik ho imi. Ema ne’ebé laiha Kristu nia Espiritu  la’os Kristu nian. Na’I ne’ebé halo Jesus moris hias husi mate, Nia Espiritu horik iha imi karik ida ne’ebé halo Kristu moris hias fali sei fo moris mos ba imi nia isin ne’ebé bele mate, husi Espiritu ne’ebé horik iha imi.

Iha Evanjelho Saun João fo garantia ba ita kona moris sei manan mate, katak Lazaru, ne’ebé mate sei moris fali! Jesus nia liafuan sira fo forsa mai ita, “ Ha’u iha ne’e, Ha’u mak Ressureisaun no Moris. Ida ne’ebé fiar iha hau, mesmu nia mate, sei moris. No sira ne’ebé fiar iha Ha’u sei la mate tan.

Iha mundo ema mate lor-loron, mate tamba moras, hamlaha, desastre naturais no desastre oi-oin. Dala barak Ita hanesan Marta ho Maria, ita triste, tanis no fo culpa ba ema seluk no ba Jesus sei ita nia maluk ruma mate katak tansa nia tenki mate? Ita sei precisa nia iha mundo ida ne’e. Maibe ohin loron ita precisa haboot ita nia fiar iha Jesus katak moris sei manan mate.

   Conversa ho hau nia Irma ida, hau husu nia; Ita tauk atu mate? Nia dehan: Lae, Hau la tauk. Lalais ou kleur ita hotu sei mate. Hau dehan tan ba nia hau la tauk mos maibe sei hau mate iha Filipinas, hau hanoin deit mak hau nia inan aman. Sira sei tanis no triste. Ida ne’e negação ida. Naturalmente, mate halo ita tauk. Hau continua koalia  maibe tansa ita koalia kona ba mate, ita joven hela atu mate. Ita sei iha missaun atu hala’o. Labele hanoin kona ba mate lai. Hau nega tan dala ida.

    Ponto importante mak la’os koalia atu mate sedu ka kleur maibe oinsa prepara an nune’e wainhira ita nia tempu sei to’o ita pronto. Antes ita mate, primeiro ita tenki moris lai.

     Cantor Siku Mauloi( matebian) dehan katak wainhira mate hotu ona maibe ba sira ne’ebé fiar iha Kristu wainhira mate sei moris ba nafatin ho Nia. Tan liu husi nia mate nia salva ita hotu, Nia lori moris foun mai ita. Nune'e wainhira ita mate la'os hotu ona.

 

Reflesaun Husi: Irmã Maria de Fatima Pui, OP

 

   

 

Kontinua Le'e

Ita precisa naroman wainhira moris iha nakukun laran

 

DOMINGO BA DALA IV TEMPU QUARESMA

1a. Leitura: 1 Sam.16:1.6-7:10-13

2a. Leitura: Efeso 5:8-14

Evanjelho: Jo. 9:1-41

 

 

Naroman importante tebes mai ita. Maibe dala barak ita la hatene apresia ahi ka naroman wainhira buat hotu lakan. Tamba ne’e iha nakukun deit mak ita sei buka tuir naroman sei mai los husi ne’ebé?

Jesus kura ema ida matan delek maibe ida ne’e foin mak comesa. Depois de hetan kura husi Jesus, Fariseu balun husu nia atu koalia kona ba  Jesus. Nia comesa bolu Jesus “Mane ida”. Mane diak ida halo buat diak ne’e ba nia. Depois husu fali nia, nia bolu Jesus “ profeta ida”. Ikus mai nia hatan katak Jesus mak Maromak Oan, nia dehan: “ Hau fiar, Na’i.

            Jesus hasai husi nia nakukun, nune’e nia bele hare buat hotu. Jesus mak naroman mundo nian, lori ema ne’e husi matan delek ba vijaun, no improtante liu, husi vijaun ba cumprensaun klean kona ba naroman ida ne’e.

Matenek nain ida fo hanoin ba ita katak: “iha momentu sira nakukun liu mak ita focus atu hare naroman”( Aristole). Wainhira ita moris iha nakukun laran, focus atu buka tuir naroman. Mundo ofrese ita naroman oi-oin maibe buka tuir lolos Naroman lolos nian. Naroman Jesus nia mak halo ita kumprende didiak kona ba ita nia moris. Saun Paulo fo hanoin ita atu moris hanesan naroman nia oan sira( Ef. 5:1)

 Dejeju husi fuan atu buka naroman lolos mak loke dalan ba ita atu hakonu dejeju fuan nian tan Na’I Maromak haré liu ba ita nia fuan( 1 Sam. 16:7). Husik naroman Jesus nian mosu husi ita fuan. Maya Angelou dehan katak “ laiha buat ida atu halakon naroman ne’ebé mosu husi ita nia laran”

Iha tempu quaresma ida ne'e mai ita focus ba naroman Jesus nian. Naroman ida sei leno ita nia dalan lor-loron no ba nafatin.

  

Reflesaun Husi: Irmã Maria de Fatima Pui, OP

Kontinua Le'e

ENCONTRO IHA WE MATAN IDA NE’EBÉ FO SATISFAZ BA DESEJO FUAN NIAN

 

DOMINGO BA DALA TOLU TEMPU QUARESMA

1a. Leitura: Exodus 17:3-7

2a. Leitura: Rom. 5:1-2:5-8

Evangelho: Jo. 4:5-42

 

Iha   moris ita iha diversos encontros ho ema oi-oin, iha fatin la hanesan ho experensia diferente. Iha encontro sira ne’e ita iha sentimento no satisfasaun la hanesan mos. Iha encontro balun ita bele haluha lalais deit no iha encontro balun susar ita atu haluha no ita sei hanoin nafatin no rai iha ita nia fuan tan ita aprende buat foun no significativo husi encontru sira ne’e iha moris.

Iha Evanjelho ohin nian haktuir mai ita kona ba sorumuto ka hasoru malu entre Jesus  ho Feto Samaritana iha we matan Jacob nian. Feto ida ne’ebé laiha naran buka nafatin ema ida atu fo satisfasaun ba ninia fuan.  Ikus mai, nia hasoru Ida ne’ebé transforma nia moris.

Hasoru malu entre  ema Judeu no Samaria ida ne’ebe quebra barrera  entre sira tan ema Judeu ho Samaritano sira labele koalia ba malu tuir sira nia lisan tan iha diferensa oi-oin.

Husi istoria ne’e haktuir mai ita kona ba:

1.       Sorumutu ka Hasoru malu: Jesus la’o kole, tur iha we matan no feto ne’e mai atu kuru be’e. Sira hasoru malu iha we matan ida.  .

2.      Conversação:  Jesus dehan ba feto ne’e:  fo be mai Hau atu hemu. Feto hakfodak tan Judeu ida labele koalia ho Samaritana sira. Tan Jesus hase nia, entaun nia komesa koalia ho Jesus.

3.      Mudança iha fuan: Jesus hatene kona ba feto ne’e inclui nia laen sira. Jesus la hare ba nia sala maibe nia hakarak hakbesik ba nia. Jesus hatudu ninia domin ba nia atu fo ba nia we ne’ebe sei la hamrook tan. Nune’e Feto converte an.

4.      Haklaken Liafuan Diak: Nia halai kedas ba haklaken ba ema sira iha vila tomak no ema Samaritano sira fiar katak Jesus mak we matan moris. Jesus mak Messias.

Iha tempu quaresma ne’e nia laran convida ita atu keta tauk buka Jesus. Nia hein nafatin ita mesmu dala barak ita la’o ses. Nia cunhese ita inclui ita nia sala sira maibe Nia hadomi nafatin ita. Nia hakarak ita hemu husi we matan lolos nian atu ita la hamrook tan.

Iha Salmo 42 haktuir katak: Nudar rusa buka we matan moris, nune’e mos hau klamar buka Ita Na’i. Buka nafatin Nia, tan se ita nia hakarak lolos mak Maromak ita la hakarak tan buat seluk ida.

Reflesaun husi; Irmã Maria de Fatima Pui,OP

 

Kontinua Le'e

TEMPU DIAK IDA ATU RONA

 

Domingo Daruak Tempo Quaresma

1a. Leitura: Gen. 12:1-4

2a. Leitura: 2 Tim 1:8-10

Evangelho: Mt. 17:1-9

 

Belun sira, Tempu quaresma mak tempu diak ida ba ita atu rona no rona didiak. Atu rona didiak, ita precisa tilun diak, fo atensaun tomak, no iha fuan nakloke atu rona.

Iha lian barak iha ita nia le’et no dala ruma ita iha confujaun atu rona los mak ida ne’ebé los?Tamba sa ita precisa rona? Ita rona atu cumprende ka ita rona atu fo ita nia razaun?

Iha belun ida fo hanoin hau atu rona sem discutir, tan dala barak hau rona maibe hau mos prepara atu hatan ou fo hau nia rajaun.

Saun Mateus iha evanjelho ohin loron nian descreve mai ita Jesus ninia transfigurasaun. Iha nebá, Saun Pedro, Saun Tiago no Saun João haré Jesus nakfilak an, sira hare Jesus nia Gloria no sira mos rona lian ida mosu: “IDA NE’E MAK HAU OAN DOBEN, RONA NIA BA”.

Rona iha ne’e refere ba atu rona Jesus, rona atu kumprende katak atu hetan Gloria, Jesus precisa terus, mate no sei moris hias. Nia hakarak ita rona didiak atu nune’e ita bele converte ita an no bele tau iha hanoin katak sufremento, terus, mate sai parte husi ita nia moris maibe la’os ida ne’e deit tan loron ida ita mos sei moris hias hamutuk ho Kristu.

Dala ruma iha ita nia moris ita hakarak buat hotu diak no ita lakohi terus maibe ida ne’e mak ita nia realidade. Ida ne’e mak ita nia moris hanesan fiar nain ida.

Rona didiak sei fo benefisiu mai ita. Rona no halo tuir lori ita atu transforma an, liu-liu sei ita rona nafatin Maromak nia lian ho diak, ita sei hetan bensaun Na’I Maromak nian iha ita nia moris.

Iha primeira leitura fo hanoin mai ita katak Abrão rona Maromak nia Liafuan, sai husi nia rain ba rai ida ne’ebé Maromak promote ba nia, hetan bensaun husi Na’I Maromak(Gen. 12:1-3)no ikus mai nia sai Aman Fiar nian. Iha Segunda leitura São Paulo fo hanoin atu rona Jesus ne’ebé  bolu ita ba dalan santidade nian( 2Tim 1:8).

Dalan ba santidade mak moris tuir Jesus ninia hanorin sira. Cardinal Francis Thuon dehan katak “sei ita moris iha cada minute diak los, ita moris iha santidade”.

Nune’e belun sira, iha tempu quaresma ne’e nia laran, mai ita rona no moris tuir Jesus atu ita nia moris bele sai diak liu tan. Atu hetan moris diak liu, ita precisa simu terus no mate no fiar katak ita sei moris hias.

 

Reflesaun Husi: Irmã Maria de Fatima Pui, OP

 

Kontinua Le'e