“NA’I MAK HA’U NIA BIBI-ATAN, HA’U LA FALTA BUAT IDA”

 

                        DOMINGO BA DALA HA’AT TEMPO PÁSCOA NIAN

 

                                        1ª Leitura: Acts. 4:8-12

                                        2ª Leitura: 1 Jn 3:1-2

                                        Evangelho: João 10:11-18

 

                Ohin loron ita hasoru mundo perigozu, ita mos presiza Bibi-Atan ne’ebe Diak atu lori ita ba rai luan nakonu ho du’ut matak no ba bee ne’ebe suli. Maibe Bibi-Atan ida ne’ebe oinsa nian? Bibi-Atan ne’ebe lo-los sai atan atu servi, atan atu kuidado, presiza domin, sakrifisiu, responsabilidade, humildade, Espiritu rona nian, foti risku no iha fuan ne’ebe sensitivu atu rona ba nia bibi sira nia halerik. Halo sakrifisiu hodi se an iha udan no anin nia leten hodi lao sai ba buka nia bibi sira ne’ebe lakon, proteje bibi sira husi anin fuik, proteje husi foho naruk, Foti risku atu fo nia an ba salva nia bibi sira husi Asu fuik sira nia liman no tau atensaun no rona ba nia bibi sira atu lori sira buka duut matak no be’e atu fo moris ba nia bibi sira. Halo sira nee hotu tamba ho domin ne’ebe Bibi-Atan iha ba nia bibi sira.

            Maluk doben sira mak Kristu hadomi, ohin ita tama ona ba Domingo IV tempo Páscoa nian. Tradisionalmente, Domingo ida ne’e, hanaran núdar Domingo Bibi-Atan Diak/ Bom Pastor. Domingo ida ne’e mós dedika núdar domingo vokasaun mundial: ita reza ba vokasaun no hanoin hikas ita ida-idak nia vokasaun núdar sarani.

            Iha Evangelho ohin nian furak teb-tebes,  São João inspira  ita hodi hateke ba Jesus no se tilun hodi rona senti katak Jesus mak Bibi-Atan ne’ebe lolos ba ita nia isin no klamar. Jesus la mai nu’udar ukun nain polítiku, ulun-boot nebe mandadór, laos iha posizaun a’as  atu buka ema hahi  maibe Jesus buka atu trata ema hotu hanesan, la hare ba nia kiik ou bot, matenek ou beik, kiak ou riku, basa iha Maromak futar oin ita hotu hanesan. Tamba ne’e Jesus mai hanesan Bibi-Atan ida. Nia mai atu tau matan ba ita no atu dirije ita ho laran luak, hanesan Bibi-Atan ida dirije ninia bibi sira. Nia mai atu buka tuir nia bibi ne’ebe mak lakon, nia mai atu hatudu dalan ba nia bibi sira no nia konhece diak liu tan nia bibi sira. Nia kuidadu no lori sira ho domin bo’ot gratuita. “Ha’u mai atu ema hetan moris, hodi moris di’ak liu tan.”

            Belun doben sira, mai ita halo exame da konsiensia hare fila fali ba situasaun ne’ebe mak ita hasoru liu-liu iha momentu ne’ebe ita hasoru diffikuldade oi-oin, problemas oi-oin, susar oi-oin senti lakon, senti moris nee laiha ona valor, la hatene ba los ne’ebe no dok los husi Maromak. Husu ba ita nia an, iha ha’u nia vida moris  iha Bibi-Atan ruma tau matan mai hau ka lae? Pesoalmente barak los, Jesus uza ema seluk sai instrumentu Bibi-Atan Diak ba ita nia moris. Nune’e ita iha koragem dehan ba ita nia an katak Se Jesus mak ha'u-nia Bibi-Atan, entaun ha'u mak bibi ida iha Jesus nia bibi-lubun. Jesus hatene ha'u. Nia bolu ha'u hodi naran. Ha'u hatene ninia lian. Jesus buka ha'u bainhira ha'u lakon. Jesus tau ha'u iha ninia kabaas laran. Jesus konvida ha'u atu fila fali ba bibi-lubun bainhira ha'u la'o dook. Jesus dirije ha'u ho laran-di'ak ba fatin ne'ebé di'ak liu ba ha'u. Ita bele haree ida-ne'e liuhusi orasaun. Hanoin to'ok oinsá Jesus hateke ba Ita. 

        Hanoin to'ok kona-ba Maromak ne'ebé buka ita kuandu ita lakon. Hanoin to'ok kona-ba ninia ksolok hodi buka Ita, foti Ita no tau Ita iha ninia kabaas. Ida nee mak grasa wain ida ne’ebe ita simu husi Na’i, nune’e grasa ida ita simu la bele rai de’it iha ita nia an maibe presiza fahe mos ba ema ne’ebe presiza grasa nee. Agora, nafatin husu ba ita nia an, iha hau nia moris hau hasoru Bibi-Atan Di’ak ne’ebe tau matan mai hau. Oinsa ho ema seluk, sira mos presija hau sai nu’udar Bibi-Atan di’ak ida ba sira nia moris? Nudar Kristu nia dixipulu; Jesus husu perguntas dala 3 ba Simão Pedro no ba ita ida-idak:  O hadomi Ha’u? Sé o hadomi Ha’u tau matan ba Ha’u nia bibi sira.

        Aliende ne’e ohin mos domingo vokasaun mundial nian, ita reza ba vokasaun vida relijiozu/ relijioza sira, vida konsagrada nian atu fiel nafatin iha dalan vokasaun nian, dalan Maromak nian hodi kontinua Jesus nia misaaun hodi sai nudar Bibi-Atan Di’ak ba ema sira ne’ebe mak hamlaha no hamro’ok ba Maromak nia domin.

        Ikus liu ho momentu furak ida nee atan hau hakarak hato’o mós hau nia novidades ba  belun doben juven foinsa’e feto-ran no mane klosan sira, hau hatene mundu ohin loron oferse ba imi ho lian oi-oin. Lian ne’ebe halo imi fuan kanek, lian ne’ebe hafahe imi nia relasaun no Maromak, lian ne’ebe halakon unidade no paz iha familia uma laran, lian ida ne’ebe sobu imi nia amizade ho kolega diak sira no lian ida ne’ebe mos lori ksolok no esperansa ba imi nia moris. Maibe lian ida oinsa nian maluk sira? Dala wain la fasil ba ita atu rona lolos lian ne’ebe lori paz mai ita nia fuan. Dalaruma la fasil atu hili dalan ne’ebe los ba ita nia moris tamba iha lian oi-oin mak mosu mai iha ita nia hanoin no imaginasaun. Entaun koko hakbesik an ba Maromak, rona Maromak nia futar liafuan atu leno dalan ba imi nia moris. Dalaruma la hatene atu hili dalan/ vokasaun ne’ebe los ba imi nia moris, koko hakbesik an ba Padre no Madre sira atu lori imi, sai matadalan ba imi, ajuda imi atu descobre dalan ne’ebe lolos Maromak haraik ona ba imi ida-idak.

         Nune’e mós presija lê Biblia, halo reflesaun, meditasaun, contemplasaun no orasaun  atu lori imi hotu hodi rona lian ida ne’ebe lolos mai husi Jesus. Tamba ita ida-idak uniku, missaun la hanesan no dalan la hanesan no moris nee dala ida de’it. Se ita la halo missaun lolos ne’ebe Maromak haraik ona mai ita, laiha ema ida mak kontinua missaun nee no missaun nee rasik hein hela ita nia prezensa. Tamba nee mai ita konvida Na’i nia prezenja, husu Na’i nia grasa ajuda ita atu descobre Maromak iha atividade saida de’it mak ita halo no tulun ita atu rona ba lian no hetan ita nia missaun lolos ne’ebe Maromak haraik ona mai ita ida-idak. Hanesan Jesus nia missaun  sai bibi-atan di’ak  atu salva ita hotu husi sala no lori ita hotu ba hamutuk ho Maromak, Moris Rohan-Laek. Nune’e mós ho hananu knananuk nian dehan “tamba hau Nia Maromak bibiatan diak lao ho hau nafatin ihadalan susar… Lori hau ba we matan haraik kbi’it mai hau, hau se la hetan susar tamba Nai hamutuk hau.” 

 

 Hakerek husi : Irma Zelina da Silva Mendonca

 

 

 

 

 

 

 

 

 

Kontinua Le'e

MORIS IHA RELASAUN HO NA’I NEBÉ MORIS HI’AS ONA

                               

 

                   DOMINGO BA DALA TOLU TEMPO PÁSCOA NIAN

 

                                        1ª Leitura: Act. 3:13-15

                                        2ª Leitura: 1 Jo. 2:1-5a

                                        Evangelho: Lc 24:35-48

        Apostolo sira bele hare maibe la komprende, bele rona rona maibé la bele hare-hetan, bele kaer, maibé la fiar, tan ne'e Kristu loke sira-nia neon hodi komprende kona-ba Jesus nia mistériu sira kona-ba ninia pasiénsia, mate no moris-hias ne'ebé hakerek iha Pentateu, profeta no salmu sira. Bainhira rona  tiha, sira hetan knaar atu haklaken kona-ba arrepende an hodi Kristu nia naran no sai nu'udar sasin ba Nia.

     Ohin ita tama ba Domingo ba dala tolu nian iha tempo Páscoa. Evangelho ohin nian, São Lucas inspira tebes ita ba experiência Apóstolo nain rua nebé ba knua Emaús nebe dominante ho tauk, dúvida maibe Jesus fo coragem, “Tan sá imi fuan taridu!”

     Jesus hatudu ba ninia Apóstolu sira katak nia isin-lolon iha kanek no dehan: “Haree ha'u-nia liman no ain ba” - kanek - “Hau duni mak ne'e”. No atu menán Apóstolu sira nia laran , Jesus  husu ai-han no han iha sira-nia oin. Apóstolu sira senti kontente no hakfodak.

     Maluk doben sira, iha Evangelho ohin nian lori mai ita liafuan importante tolu; Atu hateke, atu kaer no atu han. Liu husi hahalok sira-ne'e, ita bele hetan ksolok husi ita-nia reuniaun ho ita-nia Nai ne'ebé moris hi'as.

     Ulukliu: Haree ba. Jesus hatete: “Haree ha'u-nia liman no ain.” Haree la'ós de'it katak hare’e maibe buat ne'ebé importante liu fali ida-ne'e. Ne'e envolve ita nia intensaun no desejo/ hakarak. Hare’e  mak hakat primeiru atu la hatudu hahalok indiferensa, hasoru tentasaun atu hateke dalan seluk, hateke ba malu bainhira ema seluk hasoru susar no terus. Mai ita husu pergunta ida ba ita-nia an: Hau haree ema seluk nia terus no susar sira no ajuda sira ka ha'u la hatene kona-ba sira?

 Segundu: Atu kaer. Saõ Lucas hakarak dehan katak Kristu ne'ebé moris hi'as la'ós anju aat ka rai-na’in. Iha ne’ebá iha  nafatin fíziku kona-ba nia. No agora, hodi konvida dixipulu sira atu kaer nia, atu haree katak nia la'ós anju aat ida, Jesus hatete ba sira katak nia kaer ha'u. Ida  ne'e Jesus hatete ba ninia dixipulu sira no ba ita hotu, atu labele hadok an husi Jesus maibe tenki hakbesik ba Jesus “mai besik ha'u, no kaer ha'u.” Maluk doben sira, loos duni katak ita nia relasaun husi Maromak nunka mais haketak ho distancia. Dalabrak ita senti tauk no dúvida ho ita nia fiar maibe Jesus nafatin konvida ita hotu atu hakbesik ba nia, kaer nia hodi nune’e ita hetan renovasaun bai ta nia fiar sira no transformasaun bai ta nia hahalok sira.

 Terseiru: Han. Ida-ne'e hatudu katak ita-nia isin presiza fó-han ba ita-nia an atu moris. Ita han hamutuk ho ita-nia família ka belun sira, nune'e, ida-ne'e sai nu'udar liafuan domin nian, nu'udar liafuan ida-ne'ebé hatudu dame, selebrasaun hamutuk no despedida.  Hanesan ita hare antes Jesus mate, nia han hamutuk ho ninia dixipulu sira. Hanesan Nai ne'ebé moris hi'as ona, nia mós han hamutuk ho ninia dixipulu sira. No agora fahe hahán ida mak Eukaristia, ne'e sai ona sinál simboliku ba ita-nia komunidade kristaun. Han hamutuk Kristu nia isin mak buat ne'ebé importante liu iha ita-nia moris. Hodi han ninia isin, ita sai fali hanesan Kristu. Hanesan Santo Padre Papa  Francisco hatete, “sai ema kristaun la'ós hanesan doutrina ka hanoin morál, maibé hanesan relasaun moris ho Nai ne'ebé moris hi'as ona.” Ita hateke ba nia, ita kaer nia, ita hetan nutrisaun husi nia no transforma ita-nia fiar no domin liuhusi ita-nia haree. Tamba Jesus nia moris hias lori naroman mai ita atu lao sai husi nakukun laran ne’ebe ita hasoru.  Ohin Maromak Futar Liafuan sunu mutuk ita neon ho Espírito Ressuscitado missão sai buras no barak liu tan hodi hamosu hanoin atu halo kolaborasaun ho Maromak hodi fo sasin ninia liafuan di’ak no domin ba ema hotu.

Reflesaun Husi: Irmã Zelina Mendonça da Silva, OP

Kontinua Le'e

DAME HELA HO IMI

 

 

                                DOMINGO BA DALA RUA TEMPO PÁSCOA NIAN

 

                                        1ª Leitura: Apos. 4:32-35

                                        2ª Leitura: 1 Jo. 5:1-6

                                        Evangelho: João 20:19-31

Wainhira ita hakarak moris iha paz nia laran uluk nanain, kria uluk paz nee iha ita nia an atu nune’e bele lori paz ba ema seluk. Nune’e paz nee rasik sei fila fali mai ita hodi hafutar ita fuan hakmatek ho paz, domin, dame, perdaun no laran luak.

        Maluk doben sira hotu mak Kristu hadomi, ohin ita tama ona ba Domingo ba dala rua Tempo Páscoa nian. Domingo ida ne`e hanaran Domingo Divina Misericórdia basá Santa Kreda hakarak ita tau atenção liu ba misericórdia (laran luak) Nai Maromak nian ne’ebé próprio ita hetan iha Nai Jesus.

        Iha Evangelho ohin nian, Jesus mosu ba nia Apóstolo sira dehan “Paz hela ho imi” Liafuan “Paz hela ho imi”, uluk knanain hatudu: consolação, coragem, fo laran metin, atu Apóstolo sira hela iha hakmatek laran. Sorin seluk, ita reflete fila fali ba wainhira momentu  ne’ebé susar, terus ema baku Jesus, Kastigo to fo aan ba mate iha Kruz Apóstolo sira halai lakon hotu, to balu ema husu dehan la hatene Jesus. Nee mak akontese mai ita humanamente buat ne’ebé susar atu halakon husi ema sira hanesan ne`e mak: hirus, laran moras no ódio. Liafuan sira hanesan paz no perdão, sei la hetan fatin iha ema ne`e nia fuan. Maibe Jesus hatudu hahalok ida extraordinário husi ita ema bai-bain.    

        Nia la hasai liafuan aat no kroat ba nia Apóstolo sira hanesan: traidor, hanoin aat, taukten, rai ódio, etc., maske balu husi sira involve indireta iha hahalok violento hasoru nia, balu halo traição no balu nega nia. Contrário husi ne`e, Jesus hasé Apóstolo sira ho liafuan paz no hakmatek. Hahalok hanesan ne`e sai deit husi ema ne’ebé iha fuan bot, hatene hadomi no hatene perdua.

        Tamba ne’e ohin ita selebra Domingo Divina Misericórdia, lori ita atu reflete fila fali ba domin, laran luak Na’i Maromak nian. Agradece ba grasa wain ne’ebe ita simu iha situasaun susar no dificil nia laran, ita hanoin hasoru dificuldade Maromak husik ita mesak maibe Na’i nee laran luak nunka mais husi ita mesak iha situasaun saida de’it. Agradece ba Jesus tamba graça domin ne’ebe halo mai ita hodi hetan salvasaun. Divina Misericórdia ne`e mos missão ida. Ita simu graça no perdão gratuitamente husi Nai Maromak. Tanba ne`e ita iha missão ida atu hatudu laran luak no lori perdão ne`e ba ema seluk.

        Tamba dala barak ita tau atensaun liu ba ita nia inimigo sira, focus liu ba fraqueza ema seluk nian, hirus, baku malu, no hakarak balas malu ba buat ne’ebe akontese ona iha passado. Ho aktus hirak nee hodi haluha tia missaõ ne’ebé Na’i Maromak haraik mai ita hotu. Ita hotu simu missão ida husi Jesus atu tulun maluk sira ne’ebé moris iha susar laran no hanorin ema liu husi ita nia testemunha de vida atu hatene fo perdão ba ema seluk no hatene agradece no fiar metin Nai Maromak.

 

Reflesaun Husi: Irmã Zelina Mendonça da Silva, OP

Kontinua Le'e

MAI, HARE NO FIAR

                                  DOMINGO DE PÁSCOA DA RESSUREIÇÃO DO SENHOR

  

1ª Leitura:Atos. 10 34ª:37-43

2ª Leitura: Col. 3:1- 4

Evangelho: Jo. 20:1-9

 

 

Maluk sira hotu, ohin loron boot ou loron especial. Loron Domingo ne'ebé mak importante iha tinan ida nee ba ita sarani sira. No Domingo ida nee fo sentidu ba ita hotu.

 Loron tolu ba tridum pascua nian no loron premeiru ba loron cinquenta nian. Loron ohin mos loron ne'ebé mak importante tebes ba: JESUS NIA MORIS HIAS….ALELUYA…

Iha leitura ohin loron fo hanoin mai ita  katak; ITA HAN HO HEMU HAMUTUK ONA HO NIA, DEPUES NIA MORIS HIAS. Iha libro apóstolo sira  nia hahalok, ofrece mai ita testamuniu ne'ebé mak kapas tebes oinsa ema kristaun uluk sira hatudu sira nia fiar ba Jesus nia moris hias. No fa afektu ba comunidade sira ne'ebé mak apostulu sira moris ba. Husi esperensia paskua halo sira sai ema primeru ne'ebé mak fo testemuniu konaba Jesus nia moris hias. Sira mak sai testego lolos nian konaba akontasementu anunsiasaun. Experensia paskua nian mak halo ita comprende ho comunidade no haklaken Evanjelhu ba ema hotu.  Nunee ita hotu ohin loron tenki koko ita nia forsa kona ba moris hias hodi hatoo no fahe ita nia fiar ba ema seluk.

Fiar iha Kristu nia moris hias laos atu rai ba ita nia an rasik o ba familia deit maibe fahe mos ba maluk sira seluk. Lia fuan Pedro nian ohin se sai realidade esperanza katak buat hotu se sai los, ita mos han ho hemu hamutuk ho Jesus iha nia moris hias. Manera especial ohin iha eukaristia ne'ebé mak ita celebra hamutuk.

 

Maluk sira hotu mak Kristu hadomi; MAI, HARE NO FIAR. Opsaun ida ne'ebé mak ita ofrece iha liturgia ida nee relatu ho experensia Maria Madalena hamutuk ho Pedro no eskolante sira ne'ebé mak Jesus hadomi. Maria Magdalena mak sai ema primero nebe mak descobre konaba Jesus nia moris hias ne'ebé mak la iha rate no nia ba avizu ba nia eskolante sira..

Relata ho historia ne'ebé mak akontese konaba Jesus nia moris hias, historia nee koalia konaba detalla uitoan deit maibe fo naroman ba ita atu hare husi lia fuan sira nebe limitasaun deit. Moris hias iha símbolo no signifikasaun tebes ne'ebé hatudu ho fiar, laos bukti realidade maybe hatudu ho imagen konaba saida mak akontese. Rate la’os mamuk, maibe nakloke no nakonu ho sinal oi oin.

Maluk sira, Importante loke ita nia ann no haklean ita fiar konaba experensia misterio ne'ebé iha selebrasaun mak ita fiar ho an tomak hodi bele hare ho matan foun no iha fiar los. Ita mos hanesan disiplu sira la comprende diak lia fuan sira nee.

 Nunee ita tenki haraik ann no loke nia fuan hodi comprende dia-diak sentido moris hias nian.Jesus nia moris hias sai hanesan naroman no kbiit ne'ebée mak hlo ita sai kapas hodi sai evangelisasaun no testigus hodi Maromak nia presencia ba maluk sira seluk.

Ksolok pascua nian sai hanesan fortaleza iha tinan tomak, no lo-loron. Hanesan Amu Papa Francisco nia primeru dokumentu hateten; Ksolok Evanjelhu nian(Evanjelhu Gaudium): Iha Igreja ita presija fo testemuniu ksolok Evanjelhu nian

, ksolok paskua nian, ksolok oinsa atu hadomi no hatudu ba Maromak hadomi ita rohan laek.

Mai ita husu ba ita nia rasik; Oinsa hau halao paskua nee? Hau bele hetan ksolok paskua nian? Hau bele sai testigu konaba moris hias o hau seidauk asume hau nia indentidade hanesan disipulo lolos? Mai ita refleta ba nia an ida-idak.

 

 ! FELIZ PASCUA DA RESSUREIÇÃO BA ITA HOTU…. !!! JESUS MORIS HIAS ONA!  ALELUYA….ALELUYA.

 

Reflesaun Husi: Irmã Natalia Fouk, OP

Kontinua Le'e

JESUS MAK MAROMAK NIA OAN LOLOS

                                                                 DOMINGO RAMOS

1ª Leitura: Isa 50,4 -7

2ª Leitura: Filip 2:6-11

Evangelho: Marc 15:1-39

 

    Maluk Sira, semana Santa hahu ho Domingo Ramos o Domingo Paixão. Ohin Igresia fo mai ita aportunidade hodi hahi Jesus iha ita nia fuan hanesan Nai Liu Rai no centru ba ita nia vida. Ema hahi no hakilar ba Nia: HOSANA DAVID NIA OAN, NE'EBÉ MAK MAI HODI NAI NIA NARAN. Ita hakarak tuir Cristu, maski defisil no komplekadu tebes, mabe ita fiar katak ita se hetan moris naroman, nee mak naroman moris rohan laek nian.

 Iha evanjelhu saun Markus nian hateten katak paixão Jesus nian. Jesus hetan tentasaun oi- oin, negasaun no husik Nia, buat hotu tanba domin no obedensia ba Maromak nia planu. No kortina iha templu nian se nakles, nee simbolisa katak aksesu Maromak ba ita hotu no Kristu nia mate.

 Iha Evanjelhu domingo ohin hatudu konaba drama salvasun nian, iha neba mak obedensia, haraik an no sakrfisio ne'ebé mak ofrece no sai regalu moris rohan laek nian.

 Maluk sira, Jesus halo hakfodak ita iha loron primeru ema sira acompanha too Jerusalem ho kuda buru, hodi hein atu salebra Paskua ho diak no vitoria, maibe Jesus mai atu halo tuir ho sakrifisiu hodi saran an no celebra vitoria Maromak nian no mate iha Cruz.

Iha cidade Judea Jesus nia moris fatin, Nia moris, boot no to'o Nia mate sai hanesan mehi liberasaun definitifa, iha sidade ida momento neeba fatin santu, ema barak hein hela libresaun husi obra mesias ida ne'ebé mak Maromak haruka. Ema balun hanoin katak Jesus mai ho poder atu halo povo Judeo sira libre husi sira nia enemigo.

Lia fuan seluk sira mehi ema ida ne'ebé iha poder atu salva sira husi polika ho ekonomia hodi sira nomina nasaun tomak, Maybe Jesus nia manera oin seluk no importante ho relijiaun ema judíu sira nian.

Nunee iha relatu evanjelhu domingo ohin ho kuda buru, Jesus sae kuda buru ho dignidade liu ho kuda tama iha Jerusalen ema barak hakilar no hahi NIA, hosana Nai liu Rai, sira hakilar ho haraik an, respetu no paz.

 Laos liu rai ida mak atu ukun nasaun ida, maibe liurai ida mak lori dame ba mundo tomak. Husi nee, Jesus  koalia mai ita konaba fiar, misión no dalan ne'ebé atu lori ita too dalan liberasaun no ksolok nian. Inspirasaun ida Jesus dehan mai ita, ida nee mak DOMIN ne'ebé serbi ema hotu no  fo gratuita ba ema hotu nia diak. Ema ne'ebé simple no haraik an se hetan Jesus Nazaré Mesias lolos nian, ne'ebé mak hahi nia hanesan maksoin. Nunee eskolante sira hamutuk ho nia hodi rona, simu ho kontenti hodi selebra Mesias domin nian ne'ebé mak Jesus hatudu mai ita.

Maun alin sira, Ita nudar ema sempre sufre no nunka satisfetu ho buat hotu ne'ebé ita iha, sempre lao buka ho manera oi-oin no hein nafatin. Dalaruma iha mehi ne'ebé mak as liu maski buat ne'ebé mak ita hakarak dook liu husi ita maibe buka tuir nafatin. Ida mak hanaran mehi iha loron manas o hayalan. Maibe ita too deit mundo  mehi nian deit. Ita hakbesik ba Maromak nunee bele hatan ita nia resposta. Bainhira ita halo radiografia konaba historia bíblica ita sei hetan promesa Maromak nian sei too mai no se lori ita ba moris haksolok nian.

Maluk doben sira hotu, Iha grasa ida nee mak cuaresma, ita nudar sarani atu reflete kona ba ita nia resposta ba Jesus Nazaret ne'ebé entrega nia moris tomak ba ita. Oinsa ita resposta ba DOMIN Maromak nian hatudu iha CRUZ?

Misteriu saida mak paixão Jesus nia terus no mate, ita tau iha nia fuan hodi tranforma no kuidadu ita nia moris iha domin, servisu no entrega? Mai ita hotu ho konfiansa no agradese hodi reflete no moris ho grasa ne'ebé NIA fo no haraik mai ita ida-idak no sai sarani ne'ebé diak hodi hafahe esperanza no moris ressureição nian.

 

FELIZ DOMINGO RAMOS BA ITA HOTU!

 

Reflesaun Husi: Irmã Natalia Fouk, OP

Kontinua Le'e

Hakarak Hare Jesus

                                        DOMINGO BA DALA V TEMPU QUARESMA

  

1ª Leitura Jerm 31:31- 34

2ª Leitura Hebr 5: 7-9

Evangelhu 12: 20-33

Maluk sira, ohin ita tama iha  quinto domingo quaresma nian. Ita iha ona iha semana ikus quaresma nian, semana ne'ebé  importante ba signal anual celebrasaun semana santa. Liturgia de la palabra domingo ida nee sai hanesan Maromak nia profunda alianza haruka Jesus mai iha mundo atu salva ita.

Maluk sira: NAROMAN IHA ITA NIA LIMAN RASIK. Iha nakukun bot, kalan ne'ebé mak naruk no taka metin, difikuldade ne'ebé mosu oi-oin. Jesus mosu mai ho nia naroman. Laos leno deit maibe fo naroman ne'ebé ba mundo tomak. Ita hetan oportunidade tebes leno no fo naroman husi ita nia kiak no difikuldade sira hotu. Los duni iha naroman oi-oin ne'ebé atrae ita naroman falso nian hanesan dekorasaun no buat seluk tan, ida hanesan fo ita sensasaun momento deit, maibe ita presija liu naroman los nian. Nune’e mak Maromak, naroman ne'ebé mak mai husi Kristu hanesan sasukat ba igreja sai unidade ho Kristu mak lia los no naroman mundo nian.

Iha Evanjelhu ohin loron nian fo hanoin katak, iha versaun okasaun, problemas no confliktu sira ne'ebé Jesus hasuru autoridades religiosos sira, ema diak sira no grupo fiar nain Judaísmo sira nian nee lia fuan ne'ebé hakeraek nanis ona. Jesus halo nia síntesis sira iha mandamentu rua  importante mak Hadomi Maromak liu buat hotu no hadomi ema seluk ema seluk hanesan ann rasik. Ne'ebé hadomi nia halo tuir nia lei, sai Perfeito no santidade ne'ebé mak ema santu halo tuir ida nee hanesan PONTE DOMIN NIAN. Hanesan Papa Bento XVI nia lia fuan dehan: Maromak mak domin ardente caridade no iha an tomak. Ho forsa transforma mundo atu sai diak liu tan liu husi ita nia ann no fuan tomak.  Lei  foun la impede oinsa atu aprende normas no oinsa atu tuir Cristu nia dalan, hodi trasforma ita nia fuan.

Maluk sira, Jesus haklaken Maromak nia lia fuan atu ita bele rona ho diak, hodi halo tuir, ho valor no construi relasaun diak ho maluk seluk hodi harí mundo ne'ebé iha damai no paz.

 Ita nudar sarani ita tenki sai modelo ne'ebé mak diak no fo ejemplo diak hodi sai ponte lia los nian no inspirasaun ba maluk sira seluk. Jesus Maromak nia oan, se converte no sai modelo ba iha hahalok no fiar nian. Rona no halo tuir Maromak nia lia fuan, hanesan lia fuan sira ne'ebé mak tenki kontinua nafatin. Rona Maromak signifika: halo tuir, no la halo tuir signifika la rona Nia lian.

Ita nia cultura a’at ida ne'ebé lakoi halo tuir no la obedece. Dala ruma ita la ba misa, la reza no hado'ok an husi NIA, maibe bainhira hetan susar, problema no terus mak foin fakfodak no hakbesik Maromak. No bainhira iha tempo diak ita haluhan NIA.

Maluk sira, Agora no momento ida nee ita hasuru malu ho Jesus atu hadia ita nian a’an hafoun ita nia espíritu hodi rona no halo tuir Maromak nia lia fuan. Oinsa atu lori ema seluk ba naroman o sai ejemplo naroman ba ema seluk?

Uluk knanain sai naroman ba ita nia rasik, signifika katak tenki sai sasin iha tempo saida deit. Maromak hakarak ita nia fiar nafatin ba iha Nia, tanba ho domin boot nee hatudu mai ita liu husi cruz no salvasaun Jesus.

Mai ita hadia ita nia ann hodi hetan moris fuan nakonu ho ksolok no santo iha tempo no momentu ida nee. Maromak haraik bensa nafatin ba ita ida-idak. 

 Feliz domingo ba ita hotu…!!!

Reflesaun Husi: Irmã Natalia Fouk, OP

Kontinua Le'e

Ema ne’ebé mak serbisu ho los sei hetan naroman moris nian

        DOMINGO BA DALA IV TEMPU CUARESMA

1ª Leitura: 2 Cro36:14-16 19-23

2ª Leitura: Efes 2:4-10

Evangelho: Jo. 3:14-21

 

Maluk sira, misericordia domin no salvasaun nee lia fuan sira nebe mak sai chave iha quarto domingo tempu cuaresma ida ne’e. Maromak ne’ebé mak ita fiar, hanesan Maromak ida  riku ho misericordia tanba Maromak mak domin nain ba creatura sira hotu. Maromak nia justisa  mak sai hanesan domin tanba husi Maromak nia domin mak salva ita. Nia hadomi tebes ita hodi nunee Nia haruka nia oan mane mesak mai iha mundo atu salva ita. Ita nia experensia fiar nian labele haketak ann husi Maromak nia domin los no compromisso mak lori ita nia fiar  iha Maromak nia domin.

Iha Evangelhu ohin koalia kona ba, Ita nudar ema sempre hakarak  moris nafatin. Nunee Ita nia esperensia lor loron sai hanesan testemunha  Evanjelho hanesan dalan fiar nian. Se hakarak moris rohan laek tenki fiar metin iha cristu. Nunee ita nudar cristaun, moris rohan laek tenki hare no fiar ba  Jesus iha situasaun saida deit ho ita nia esperencia amizade no relasaun metin ho Maromak. Iha dalan importante ba ita, tanba ho ita nia experensia fiar nian, no se hafahe ita nia esperansa ba moris rohan laek no posiblidade ba futuru,

Fiar iha Jesus, hanesan dalan hodi loke odamatan hodi bele hetan vida rohan laek nebee ita mehi, ida nee mak esperanza ba moris rohan laek. Maromak nia domin rohan laek ba mundo no hadomi liu ita hodi entrega nia oan mane mesak mai iha mundu atu salva ita. Nia hadomi munda  la iha sasukat no ho  laran tomak.

Iha refraun ida hateten katak “obras domin nian laos rasaunne’ebé  mak diak. Maibe obra domin Maromak  ne’ebémak hatudu mai ita hanesan  dom ida ne’ebé mak entrega nia Oan Mane Mesak mai atu salva ita hodi moris rohan laek. Nunee mate iha cruz sai hanesan aksaun domin ne’ebé mak laiha sasukat.

Domin signifika fo doação  husi nia ann rasik, KUANDU LA IHA DOMIN LA IHA DOAção, LA IHA SAKRIFISIU NO LA IHA ENTREGA.

 

Maromak foti insiatifa atu hadomi ita hakuak ita ho Nia miseria no transforma ita nia fraku hodi hetan graça. Tanba nia hadomi  liu ita no sai la premeira, tanba hakarak ita sai perfektu no sai diak liutan husi buat husi hotu. Cristu naroman mundo nian no naroman ba ita nia moris, nia ofrece naroman ba ita hodi ita sai naroman liu tan. Naroman ida nee oinsa bele halao, saida mak  iha ita nia fuan.

Maluk sira, dala ruma ita koalia bosok mak barak duke koalia los, maibe ita presija lia los hodi salva naroman ne’ebé ita iha atu sai naroman diak liu tan. Nunee Cristu mak hun husi lia los nian, ho lia los halo ita libre, tanba Maromak ponte lia los no moris rohan laek. Maluk sira, Kuaresma mak tempu atu aprende dalan domin nian no dalan atu hakribii  ita nia sala.

Mai ita fair ba NIA hodi hetan moris rohan laek.

BOM DOMINGU BA ITA HOTU NO MAROMAK ACOMPANHA ITA NAFATIN.

 

Reflesaun Husi: Irmã Natalia Fouk, OP

Kontinua Le'e