Imi Sei Sasin Kona Ba Buat Hirak Ne’e(Lk. 24:48)

 

Domingo do Ascensão do Senhor

 

1a.  Leitura : Atos. 1:1-11

2a.  Leitura : Ebr.  9:24-28;10:19-23

Evanjelho: Lk. 24:46-53.

 

 

     Belun doben sira hotu ne’ebe cristo hadomi,

 Ohin 40 dias da Pascua ou Domingo ba dala hitu iha tempo pascua nian, marka mos okaziaun ba Solenidade Ascensão do Senhor. Commemorasaun ne’e depois de Jesus nia resureisaun nia mos mosu ba nia apostolo sira, no nia sa’e ba lalehan hodi fila fali ba nia Aman nia horik fatin.

    Iha primeira leitura no evangelho kolia kona ba evento Ascensão do Senhor. No carta ba Eebreu sira koalia kona ba sakrifisio hotu ne’ebe mak cristo halo hodi fo esperansa ba ita hotu hodi hetan Nia Gloria.

    Ohin fo hanoin mai ita hotu kona ba Jesus sa’e ba lalehan la signifika nia abandona ou husik ita mesak maibe hanesan nia dehan ona katak  ha’u ba uluk  hodi prepara fatin ba imi hotu, Nia mos hateten no promete katak Nia sei mai fali iha loron ikus. Nune’e mos nia promete ba nia eskolante sira katak Nia sei haruka nia Espirito Santo mai hodi acompanha, guia no continua fo inspirasaun ba sira hodi haklaken Maromak nia liafuan ba ema hotu no sai sasin cristo nian iha rai klaran tomak.

   Tan ne’e liu husi solenidade Ascensão do Senhor ida ne’e fo hanoin mai ita hotu atu realiza ita nia an hanesan membro da igreja, ita ida-idak tenke hala'o missaun nebe Maromak tau hela konfiansa ba ita, atu sai sasin Cristo nian no lori Cristo nia naran ba ema hotu.

   Ita hotu Maromak nia oan, ita tenke esforsa ita nian an hodi halo buat ne’ebe diak hodi la’o tuir Nia no obedece ba Nia laifuan. Henesan Nia promote ona, mai ita continua husu Espirito Santo hodi guia ita, fo kbiit no motiva ita iha viagem moris hodi continua hala’o Nia missaun ho fiar no ksolok.

 

Reflesaun Husi:

Irmã Alda Batista Carvalho Soares, OP

 

Kontinua Le'e

EMA NE’EBÉ HADOMI HA’U, NIA SEI HALO TUIR HA’U NIA LIA-FUAN.

 

                                       Domingo VI da Pascoa 

1a. Leitura: Atos. 15:1-2,22-29

2a. Leitura: Rev. 21:10-14,22-23

Evanjelho: Jo. 14:23-29

Maluk doben sira mak Cristo hadomi,

Ohin, ita tama ona ba VI Domingo da Pascoa tinan liturgia C nian. Leitura sira Domingo ida ne’e nian, liu-liu iha Evangelho, Evangelista São João relata mai ita buat tolu:

Primeiro, Jesus hakarak fo hatene ba Nia escolante sira kona ba saida mak sira sei halo wainhira Jesus hiit-An sae ba lalehan.

Segundo, Jesus hatene katak wainhira Nia laiha ona, claro katak Apostolo sira sei moris iha tauk no trauma nia laran, tamba ne’e Jesus fo consolação ba sira katak Jesus sei la husik sira mesak, maibe Jesus sei haruka tulun nain ida seluk mai hodi acompanha nafatin Apostolo sira hodi continua hala’o Jesus nia missão iha mundo rai-klaran, no tulun nain seluk ne’e mak Espírito Santo.

Terceiro, simu dame husi Jesus.

Husi buat nebe menciona ne’e, lori ita nobun ba reflete pontu principal tolu husi Maromak Futar Liafuan Domingo ohin nian hanesan tuir mai:

                    I.            Hadomi significa halo tuir Aman Maromak nia liafuan

Jesus hakarak fo hatene momos ba Nia Apostolo sira katak wainhira la husik sira mesak no hiiit-An ona sa'e ba lalehan, ba Aman Maromak, Jesus husu Apostolo sira atu hadomi nafatin Maromak, hadomi Maromak significa halo tuir Jesus nia lia-fuan.

Jesus rasik dehan iha Evangelho ohin, “ema nebe hadomi Ha’u, nia sei halo tuir Ha’u nia liafuan, Ha’u Aman sei hadomi nia, ami sei mai hela iha nia uma”. Jesus nia presenza iha mundo hatudu katak Maromak hadomi tebes mundo, Maromak hadomi tebes ita ema.

Maromak haruka Nia Oan Mane mesak mai iha mundo atu halo ita ema ne'ebe moris iha mundo ida ne’e hatene hadomi malu. La ho Cristo nia presenza iha mundo, ita ema continua moris nafatin iha violência no torturação nia laran, ema continua moris hodi adora lulik liu fali adora Maromak.

Ita rona iha Primeira Leitura koalia makaas kona ba ida ne’e, husu ita atu husik ita nia toman a'at sira, hanesan adora lulik, labele han naan lulik, la bele hemu ran, labele han naan maten, keta halo sala foer hodi moris obedece deit ba Maromak nia ukun fuan. São Paulo husu atu ita halo tuir de’it Maromak nia ukun-fuan too ona.

Domin mak sai nudar base ka fundamento principal ba cristão ida nia moris. Ema ne;ebe hadomi Maromak, Maromak mos hadomi nia, basa ema ne'ebe hatene hadomi Maromak, nia sei hatene hodi halo tuir de’it Maromak nia hakarak, nia sei hanoin de’it kona ba saida mak Maromak hakarak, nia hatene obedece no no hamtauk Maromak.

Exemplo hanesan Pedro, Jesus nia Apostolo, Apostolo ida ne'ebe hadomi tebes Jesus, defende Jesus, defende Jesus nia hanorin sira to’o mate tan de’it Jesus. Oin sa mak ita bele hadomi lolos no hadomi didi’ak Maromak?

Dalan mak ne’e, ita buka lee nafatin Maromak futar liafuan hodi medita, rona nafatin Maromak futar liafuan hodi moris tuir, hafoin halo ita nia-an sai nudar instrumento ne'ebe hatene fahe Maromak nia domin ba ema seluk.

Wainhira ita husik ita nia-an sai nudar instrumento domin ne'ebe hatene transmite Maromak nia domin, Maromak sei hadomi ita, no Maromak ho Nia Ona Mane Jesus Cristo sei mai hela iha ita nia-an.

                 II.            Espírito Santo mak sei hanorin ita no fo hanoin ita

Serbisu Espírito Santo nian tulun ita, loke ita nia matan, loke ita nia tilun, loke ita nia fuan hodi la buat aat, la rona liafuan aat, no la rai buat aat iha ita nia fuan, maibe ho kbiit espírito Santo nian halo ita iha coragem hodi buka no rona nafatin Maromak futar liafuan no moris tuir iha ita nia moris.

Força Espirito Santo sei dada ita sai husi hanoin no hakaran nakukun nian, dada ita sai husi hahalok immoral sira, dada ita ses husi hahalok corrupção sira, dada ita dook husi ita nia kaan sira nebe buka ksolok isin nian de’it,  

Ikus liu, ho kbiit espírito Santo nian tulun ita atu bele compreende saida mak Maromak koalia mai ita liu husi Sagrada Escritura. Maski ita ne’e ema fraku, ema ne'ebe monu bebeik ba sala, halo nafatin sala no pecado, importante ita keta haluha, convida nafatin Espírito Santo mai horik iha ita nia-an, nune’e bele fo kbiit no força mai ita hodi bele register husi hanoin no hakarak sira ne'ebe la diak.

             III.            Simu dame husi Jesus

Jesus promete hodi husik hela presente furak ida ba ita. Presenza ne’e mak dame nebe laos ita rasik mak cria rasik iha ita nia-an, maibe dame nebe ita simu husi Jesus. Dame nebe Jesus fo mak dame nebe halo ita bele sente hakmatek ho moris ne’e hodi bele fo fuan diak.

Hahalok sira hanesan, pecado, tauk, dúvida, no hanoin no hakarak aat sira seluk tan nebe continua ukun ita nia fuan. Maibe ho dame nebe ita simu husi Na’i Jesus, bele halakon ou hases tiha hanoin no hakarak aat sira husi ita nia-an.

Maluk Doben Sira Mak Cristo Hadomi,

 Ponto de partilha tolu ne’e tulun tebes ita atu hatene hadomi Maromak no hadomi Maromak nia liafuan. Ema nebe hadomi Maromak mak sei fo testemunha kona ba Maromak. Ema nebe la hatene hadomi Maromak, sei sei fo sasin de’it kona ba buat mundo nian, osan, poder, projecto, hadau cargo, buka oin, halo corrupsaun, Domingo la mehi Maromak no la mehi besik Uma Creda.

Ema ne'ebe hatene hadomi Maromak pronto simu Maromak nia promessa sira, liu-liu promessa Maromak nian kona ba moris rohan la’ek, maibe ema ne'ebe la hadomi Maromak, nia só hanoin de’it mak kona ba moris ida agora nian, tamba ne’e mak ambição ba poder no ukun mak nakonu iha nia kakutak ka nia ulun.

Ema ne'ebe hatene hadomi Maromak, no halo tuir Maromak nia lia-fuan no ukun-fuan, sira de’it mak bele hetan moris rohan la’ek. Ema ne'ebe hatene hadomi Maromak, durante nia moris nia sei hetan naroman.

Maski Jesus besik husik ona ita hodi fila ba Aman Maromak, maibe Espírito Santo continua horik nafatin iha ita nia leet, hodi hanorin nafatin ita, halo ita bele compreende nafatin no halo ita hanoin tuir nafatin Maromak nia ukun-fuan sira.

Nudar mensagem husi reflexão VI Domingo da Pascoa ohin nian ba ita mak ne’e, ita buka obedece ba Maromak no halo tuir Maromak nia liafuan, nune’e Maromak sei mai hela iha ita nia-fuan, iha ita nia moris tomak.

Fruto husi ita nia obediensia ba Maromak hodi halo tuir nafatin Jesus nia lia-fuan sira mak ita bele sente dame iha ita nia-an: dame ho Maromak, dame ho maun-alin sira, dame ho natureza, no dame ho ita nia-an rasik.

Atu ita bele sente nafatin dame iha ita nia moris, dalan mak ne’e, ita buka halo tuir nafatin Maromak nia liafuan, obedece nafatin ba Jesus nia liafuan, mak ita bele sente duni dame iha ita nia moris. AMEN. 

Reflesaun Husi: Irmã Sabina Mota Martins, OP

 

 

 

Kontinua Le'e

HADOMI HANESAN JESUS HADOMI ITA

 

DOMINGO V DA PASCOA

 

1ª. Leitura: Atos 14, 20-26

2ª. Leitura: Apoc 21, 1-5

Evangelho: Jo.13,31-33a, 34-35

 

Maluk sira ha’u hakarak hahu reflesaun ne’e ho historia ida. Iha loron ida  jovem ne’ebé mate iha tasi laran tan deit atu salva nia belun ne’ebé atu mout. Nia konsege salva nia belun ne’e maibe nia rasik mate iha tasi. Historia sira hanesan ne’e akontese ona iha fatin barak, inklui mos iha ita nia rai. Belun ne’ebé diak mak belun ida ne’ebé saran nia vida hodi soi nia belun nia vida iha ameasa nia laran.

Liafuan Diak loron ohin nian hakarak fo hanoin mai ita atu reflete  oin sa Aman Maromak nia domin mai ita ne’ebé manifesta iha Nai Jesus Kristu. Iha Jesus Kristu ita hare Maromak nia domin ne’ebé bo’ot tan ne’e Jesus fo nia-An hodi iha krus atu salva ita ema.

Husi ne’e ita hare katak domin ne’e kna’ar ida nebe ita tenke realiza iha ita nia moris loron-loron nian, hodi hadomi ema hirak ne’ebé merese atu ita hadomi, liu-liu sira ne’ebé ema la tau matan. Hadomi sira ho domin Jesus nian. Atu ita bele hadomi ema seluk uluk liu ita tenke hadomi ita nia-an rasik no halo relasaun diak ho Jesus Maromak Oan, hafoin ita bele hadomi ema seluk.

Vokasaun baziku ba ita nu’udar ema kristaun maka ita tenke hadomi malu hanesan Nai Maromak hadomi ita. Tanba vokasaun atu hadomi ema seluk mak sasukat ida ba ita atu sai hanesan Maromak nia Oan sira no doben los. Hadomi Maromak no hadomi ema seluk maka ukun ne’ebé los no furak liu. Iha ne’ebé Maromak rasik habadak tiha Nia ukun fuan sanulu ba deit parte rua maka hadomi Maromak no hadomi ema seluk, liu-liu sira ne’ebé halo a’at mai ita.

Hadomi Nai Maromak ne’e hahalok ne’ebe fundamental ba ema Kristaun sira. Maibe oin sa ema bele hadomi? Ho dalan oin sa? Ho maneira oin sa? Oin sa atu konkretiza domin ne’e? sasukat sa ida maka ita uza atu hadomi? Atu hatan ba perguntas ne’e uluk liu mai ita ba aprende ho Jesus rasik basa Nia deit maka bele hanorin lia los mai ita, Nia rasik sei hanorin ita oin sa atu hadomi, se mak ita tenke hadomi. Tan ne’e, maluk sira mai ita sadere ba Maromak atu Nia rasik lori ita hodi hadomi Nia ho ita forsa tomak.

Reflesaun Husi: Irmã Zelia dos Reis, OP

 

 

Kontinua Le'e