Ascensaun no Jubileu: Fó Esperansa, Forsa ho Misaun Foun

                                            SOLENIDADE DA ASCENSÃO DO SENHOR

1a. Leitura: Apos. 1:1-11

2a. Leitura: Ef. 1:17-23

Evangelho: Lk. 24:46-53

Ohin loron, Igreja celebra momentu significado ida: Ascensaun Maromak-nian. Nia asende ba lalehan, fila ba Aman, maibé la husik ita mesak.Hanesan Nia dehan: “Ita sei simu forsa husi Espiritu Santus no sei sai testemunya ba Ha’u iha Jerusalém no to’o fatin oin-oin” (Apos. 1:8). Liafuan ida nee loke ita-nia hanoin ba realidade: Ascensaun la remata misaun Jesus, maibé loke dalan ba ita hotu atu kontinua.

Iha kontestu Jubileu Esperansa, Ascensaun fó hanoin no desafio foun. Nia bolu ita atu loke fuan, atu hatene katak ita sei hetan Esperansa ida ne’ebé la halai ho situasaun mundu, maibé ho Espiritu ne’ebé Maromak rasik hatama. Hanesan Jesus sa’e ba lalehan, bolu ita mos atu sa’e liu husi limitasaun, husi susar, no sai naroman iha rai ne’ebé nakukun. Jubileu nee maka tempu atu foti hela-an ba Maromak, atu reforsa ita-nia kompromisso ba justisa, paz no domin.

Espiritu Santus mak fó ita kapas, bele halo ita sai testemunya ida ne’ebé la hanoin-an deit ho lian, maibé ho moris no atitude. Prezensa Espiritu Santu iha ita nia moris mak halo ita bele hatudu Jesus ba mundo ida ne’e. Iha komunidade, iha Igreja, iha familia no iha fatin servisu ita mak korpu Maromak nian, atu halo buat ne’ebé fó vida, fo esperansa, no folin liu ba ema hotu.

Mai ita husu ba ita-nia an iha momento ida nee: Karik ha’u hakarak sai testemunha ida ba Jesus iha mundu ida ne’ebé presiza Esperansa? Karik ha’u simu Espiritu Santu iha verdade, ka ha’u sei hela iha laran tomak, susar ho tauk? Ho ida nee, Ascensaun husu ita atu hare ba  oin, ho fuan abertu, no ho domin ba Maromak.

Tan nee nudar foin sae ida ho Jubileu Esperansa nee, Maromak bolu ita ba transformasaun moris, ba esperansa ne’ebé loloos, no ba misau ne’ebé la hetan remata.Ho ida imi ho hau, Karik ita hakarak atu kontinua misaun Maromak nian iha rai ida nee, ita tenki loke fuan ba Espiritu Santus, simu Nia forsa, no moris ho esperansa. Jesus sube ba lalehan, maibé Nia la husik ita. Nia hela ho ita, no ita mak agora sai liman ho ain ba Nia domin iha mundo. Amén.

Reflesaun Husi: Irmã Dionisia Salsinha, OP

Kontinua Le'e

Cristo Nia Dame

 DOMINGO DA VI TEMPO PASCOA

1a. Leitura:  Act.15,1-2. 22-29

2a. Leitura:  Apoc. 21, 10-14. 22-23

Evangelho :  Jo. 14, 23-29

Oinsa ita halo distinsaun entre  paz ne’ebé Cristo haraik mai ita ho paz ne’ebé mundo oferese?

Ita hotu hakarak dame iha moris. Desejo paz e tranquilidade interior nian. Ida ne’e mak ita ema nia natureza. Mesmo nune’e ema barak sei hili buat ne’ebé lori desorden iha sira nia moris. Exemplo hirak ne’ebé hili moris ho vicio ba droga no hemu bebidas alcoholic. Buat hirak ne’e lori ba dame ne’ebé temporario deit no sira lahatene katak buat hirak ne’e estraga tiha ona sira nia moris no lori ona sira ba frustrasaun .

Ohin loron iha meios oi-oin mundo oferese atu desvia ema nia hanoin, asaun hodi halai sees hosi buat diak ne’ebé fo dame ba moris. Iha dalan lubuk ida ne’ebé koko harahun ema nia paz hanesan; poder, osan, infidelidade, violencia, no ida ne’ebé mak makaas liu ohin loron mak  media social ne’ebé hatudu buat furak lubuk fo ksolok wain maibe  sei lori ba dalla hatene uza ho responsabilidade.

Ksolok ne’ebé los no fo dame ba vida interior mak wainhira ita hili atu moris tuir Nai Maromak nia vontade no atu moris tuir dalan los precisa sacrifisio. Oinsa hau hatene katak hau iha dalan ne’ebé  los? Wainhira hau hili atu hadomi laos odio, fiel atu moris iha moralidade, evita atu la monu ba sala e buat seluk tan. Wainhira ita hili halo vontade Maromak nian ita sei moris iha Cristo nia Paz. Paz ida ne’ebé fo forsa mai ita atu moris iha dalan los.

Tinan 2025 sai nu’udar tinan graça nian ,convite ida mai ita  atu bele hola parte iha graça misericordia Nai Maromak nian. Mai ita ida-idak  buka hakaas-an atu bele celebra tinan Jubileu ne’e ho fuan ne’ebé libre hosi todan mundo nian no hela iha dame Cristo nian. Nune’e ita bele sai sinal esperansa nian ba mundo.

Bom Domingo mai ita hotu.

Reflesaun Husi: Irmã Olandina Baptista, OP

Kontinua Le'e

Hadomi malu hanesan Ha'u hadomi ona imi.

 Domingo Dalima Tempu  Páscua

 

1a. Leitura : Atos 14:21-27

2a. Leitura : Apocalipse 21,1-5a

Evangelho: João 13: 31-33a, 34-35

Evanjellu  ohin nian husi sao João hateten katak  “Imi hadomi malu hanesan Ha’u hadomi imi, nune’e ema hotu sei hatene katak imi Ha’u nia dixipulo, wainhira imi hadomi malu.”

Natureza Domin nian ba ita ema baibain, maka parte esensiál ida husi ita nia ezisténsia, dahuluk nian, ne’ebé relaciona ho SE MAK ITA ou SE MAK HAU.  Ne'ebé  eziste iha ita ida-idak nia moris, dala wain ita koalia kona ba domin enkuantu domin ne’ebé lolos eziste tia ona iha  ita maibe, ita lahatene forma domin nee iha ita nia fuan liu husi LIAFUAN no HAHALOK ba ita nia familia no maluk sira.

 Domin sempre fasil atu fó bainhira ita simu domin, maibe: oinsá se hau la simu domin? Oinsá se domin ne’ebé hau simu  domin ne’ebé nakonu ho  kondenasaun julgamento  no ódiu? Hau bele nafatin fó sai domin se saida maka hau hetan maka ódiu no kondenasaun no Julgamento?

Maibe ohin Jesus FANUN ITA HO NINIA EXEMPLO DOMIN NIAN katak Nia  nunka failla atu hateten ba Ninia dixípulu sira oinsá Nia hadomi sira no hanorin sira atu hadomi malu. Domin Jesus nian nee loke dalan ba ita nia fuan atu hadia no forma ita nia domin tuir NAI JESUS NIA DOMIN.  

Mai ita tau iha ita nia hanoin  katak pasajen evanjellu iha leten hahú ohin ba oin , duké sai laran-moras ka sai hirus, maibe mai ita fó glória ba Maromak no hadomi malu.  Tamba Nia maka Maromak lolos . Nia la hatudu hahalok hanesan, maibe nia hanorin ita hodi dehan HADOMI IMI NIA INIMIGU SIRA Nia hatudu dalan mai ita. Atu hadomi malu la fasil liu-liu wainhira iha traisaun. Maibé ida-ne'e maka dalan atu fó glória ba Maromak.

Reflesaun Husi: Irmã Cacilda de Fátima, OP

Kontinua Le'e

Servi ho Domin

                                                          Domingo Dahaat Tempu Pascoa 

1a. Leitura:  Acts 13:14, 43-52

2a. Leitura:  Reve.7:9,14b-17

Evangelho: Jo.10:27-30

Domingo dahaat tempu pascoa sai hanesan Domingo Bibi Atan Diak.

Bibi atan ida nia serbisu kiik liu iha sociedade maibe nia dedika an tomak no sakrifika an atu tau matan ba bibi sira.

Ohin ita rona iha Liafuan Diak, ita Nai Jesus Kristo dehan “Hau nia bibi sira rona hau nia lian, Hau hatane sira no sira tuir Hau.” Kristu mak ita nia bibi atan no ita mak nia bibi sira. Nu’udar bibi hatene no konhese no rona ba nia Nain. Nain atu ba ne’ebé sira tuir.  

Kristu hatudu mai ita nia domin no tau matan ba ita ida idak. Nia la abandona ita ka husik ita mesak. Bibi balun lakon, lao sala dalan nia buka tuir no lori mai tau hamutuk iha fatin ida ka luhan ida.

 Nu’udar sarani ita hotu bolu atu lori malu ba dalan los hanesan Kristu ne’ebé sai nudar ita nia Bibi Atan Diak no lori ita atu moris tuir lialos no atu servi ita nia maun alin sira ho domin. Nunee, ema seluk mos bele hare Kristu nia prezensa liu husi ita.

Konvida ita hotu nudar sarani ka Igreza atu banati tuir nafatin ita nia Salvador ka ita nia Bibi atan nia ezemplu diak sira. Liu liu atu fo testemunha ba ema kona ba Kristu. Bibi Atan Diak hatene rona, fo an, cuidado, no buka tuir nia bibi sira ne’ebé halai lakon.

 Atu moris tuir ejemplo Bibi Atan Diak nian ne la’os facil no  ita sei enfrenta dificuldade oioin maibe Kristu sempre iha neba hamutuk ho ita. Nia la husik ita mesak. Tamba domin nia servi, fo nia an tomak ba ita too terus no mate iha krus, no liu loron tolu nia moris hias fali.

Domin Maromak nian ne’ebé fo mai ita boot tebes liu husi ita Nain Jesus Cristu. Ba ita idadak mak kontinua nafatin atu fahe domin ne’ebé ita simu husi Nai. Ita nia colaborasaun mak atu servi ho fuan no domin liu husi buat kiik ka boot ba familia, comunidade, no sociedade. Importante mak halo buat hotu ho domin. Servi ho domin.

 

Ksolok Domingu nian ba ita hotu.

 

Reflesaun Husi: Irmã Camelia de Clito, OP

Kontinua Le'e

FILA FALI BA JESUS

                                                       3° DOMINGO DA PASCOA

1a. Leitura:Acts 5,27b-32,40b-41

2a. Leitura: Apoc 5,11-14

Evangelho. Jo.21,1-9

Jesus Nia apostolo sira mesak pescador ema, ti’ha nain sira ne’ebé professional tebes. Ida nee parte ida iha sira nia moris no servisu ne’ebé sira halo hela wainhira Jesus liu bolu sira hodi  tuir Nia.

Jesus bolu mos ita atu fila fali ba Nia. Iha ita nia journada moris nian liu liu iha tinan Jubileu nian nee, mai ita ida-idak ho lao ba hasoru Jesus iha dalan esperansa nian ho fuan  boot rekonhese  Jesus ne’ebé konvida Pedro iha sira nia dialogu ho apostolo sira seluk, haruka  soe dai ba tasi tanba Jesus hatene saida mk sira halo buka ikan iha kalan tomak  soe dai maibe la hetan buat ida. Iha parte ida tanba sira la rekonhese Jesus iha ne’ebé mosu ba sira iha tasi ibun, tanba nee sira la hetan buat ida iha kalan nee.  Hafoin rona tiha Jesus nia lian sira nian matan nakloke  ho fiar  wainhira dai nakonu ho ikan barak no dai besik ona atu nakles.

Dala ruma mos ita lakon konfiansa iha ita nia servisu balun ne’ebé ita halo ho ita nia esforsu ne’ebé makas maibe  too ikus ita  la hetan resultadu diak. Jesus nafatin husu ita atu koko nafatin lao ba oin laos atu fila ba kotuk.

Mai ida idak reflete mos ba ita nia an katak loron loron Jesus mos husu ba ita perguntas ne’ebé hanesan nia husu ba Pedro. Dala ruma ita mos hanesan Pedro hatan ba Jesus maibe ho ita nia fiar ne’ebé la hanesan. 

Iha dalan balun ita bele hatan hanesan Pedro hatan ba Jesus ou iha mos dalan balun ita nia hatan ba Jesus la hanesan, tanba  ho ita nia preokupasaun barak ba sasan mundo ne’ebé dala ruma halo ita sai vitima hodi  la rona ba Jesus nia haruka sira. 

Dala ruma iha momentu balun importante tebes, ita haluha atu rona Jesus ne’ebé bolu ita no atu rona Nia iha momentu nakukun nia laran tanba Jesus hatene buat hotu iha ita nian hanoin sira no saida mak ita halo.

Maromak nia liafuan ne’ebé ita rona encoraja nafatin atu lao hamutuk ho Jesus ne’ebé fihir  no bolu ita  iha dalan esperansa nian  ba hasoru Jesus ho fuan moos. Hatan ba Jesus nia konvite sira  ho votu de obediencia ne’ebé ita halo. Hanesan Jesus husu  Pedro ba dala tolu o hadomi hau ka lae? Bali hau nia bibi sira,responsabilidade boot ne’ebé Pedro simu maske todan maibe Pedro hatene katak Jesus la husik nia mesak. Nune’e mos ita bele banati tuir mos hahalok diak nee iha ita nia ida -idak nia moris .

Bom Domingo Ba Ita Hotu !!!

Reflesaun Husi: Irmã Zelia dos Reis, OP

Kontinua Le'e

ESPERANSA MORIS HUSI FUAN NE’EBÉ FIAR

                                                           Domingo Ressureisaun

1a. Leitura: Atos. 10:34a, 37-43

2a. Leitura: Kol. 3:1-4

Evangelho: Jo. 20:1-9

 

Esperansa foun moris husi roman Ressureisaun nian, ne’ebé loke ita nia matan fuan nian atu komprende Jesus nia terus, mate no moris hias. Ita iha fiar ba Jesus mai husi Aman Maromak ne’ebé ita la hare, maibe sentru fiar sarani nian mak ida nee, “Fiar maske la hare”. Haktuir husi Evanjelista Saun João katak; Rahun diak ba hirak neebe Fiar Maske la hare” (Jo. 20:29) ho fiar ida nee mak hamoris ita nia Esperansa foun ba salvasaun, Nunee ita mos hetan grasa gratuita atu hola parte iha Historia salvasaun humano nian.

Festa Paskua ou Ressurreição do Senhor mak selebrasaun klean no boot liu ba Santa Kreda haktuir Papa Francisco, basa husi selebrasaun ida nee ita relembra fila fali domin husi Aman Maromak ba mundo hodi fo Nia oan mane mesak atu kasu sala mundo nian, Domin ne’ebé sai exemplu fiar kristaun nian no dever kristaun sira nian atu banati tuir. Dever Kristaun nian mak atu iha Espiritu aten brani nian hodi halekar Domin ne’ebé ita esperencia iha roman Ressureisaun nian ba mundo.

Wainhira ita esperencia domin, fasil mai ita atu fahe domin nee ho ema seluk, hanesan Maria Madalena halo bainhira nia hare katak Jesus nia isin laiha ona rate, ho aten brani nia halai hodi haklaken novidades nee ho entusiasmu ba Apostolu sira, ida nee hatudu katak Nia rasik esperiencia Jesus nia perdaun no domin. Ohin ita hotu nia dever nudar sarani atu haklaken domin Trindade nian ne’ebé ita esperiencia husi Jesus nia terus, mate no moris hias ida nee, basa projeitu salvasaun nian mai husi Servisu Aman, oan no Espiritu Santo nian.

Oras nee ita lao iha Jornada Esperansa nian, nunee ita iha knaar foun atu sai esperansa nee rasik ba ema seluk, laos ho ita nia liafuan deit maibe ho ita nia moris rasik, tamba testemunha lolos husi ita nia moris presiza fo sai ba mundo roman Resurreisaun Kristu nian.

Ita hatene mos katak mundo oras nee barulho, mundo komesa ona lakon sentido de humanidade, iha ne’ebé la sente ona seluk nia halerik, iha ne’ebé la haksolok ho seluk nia ksolok, mundo ne’ebé nakonu ho individualismo, hadelek an ho dezenvolvimento de tecnologia. Oinsa mak ita atu hatoo messagem Ressureisaun nian nee ba mundo? Se ita mos konsumu hotu ho veneno ne’ebé hanesan. Oinsa ita atu hanaruk ita nia liman? Se ita mos sei hanoin atu satisfaz ita nia an, Saida mak ita atu halo? Se ita nia moris la hamoris esperansa ba terus nain sira.

Maibe ho grasa ne’ebé ita simu iha silencio Maromak nian fo mai ita Esperansa foun katak, buat hotu possible ou bele deit ho Maromak. Basá Evanjellu ohin nia assegura ita ho imagem rate mamuk ne’ebé enxe fali ho naroman moris hias nian. Ho nune’e Ita fiar katak ita iha Maromak moris, ita iha Maromak perdaun, ita iha Maromak domin, tamba nee ita mos koko atu sai moris ba ema hirak ne’ebé mak mate iha Espiritu, lori perdaun ba hirak ne’ebe mak la hetan perdua, no sai testemunha domin ba hirak ne’ebé la sente hadomi.

Jesus Moris Hias, lori Esperansa Foun: Alleluia

Reflesaun Husi: Irmã Guilhermina Da Silva Fatima Do Rego, O.P

Kontinua Le'e

DOMIN ROHAN LAEK

 

DOMINGO RAMOS

1a. Leitura:  Isaías 50, 4-7

2a. Leitura: Fil. 2, 6-11

Evangelho: Lucas 22, 14 – 23, 56

 

Domin lolos mak domin ne'ebé fo an ba mate tanba ema seluk nia diak. Saun João evangelista dehan: "ema ida labele hadomi liu fali ema ne'ebé saran nia moris tan nia belun sira”( Jo. 15:13). Jesus ko'alia ida ne refere ba Nia an, inklui mos Nia terus, mate iha krus no moris hias, ne'ebé mak ita sei ba selebra iha Semana Santa ida ne’e.

Tuir tradisaun Igreja Katoliko Romano nian,  molok atu tama ba Semana santa ita sei hahu ho Domingo Ramos. Domingo Ramos bele bolu mos Domingo de paixaun, signifika katak; loron ne'ebé Kristaun no fiar nain sira halibur hamutuk hodi comemora no simu Jesus Triumfante tama iha sidade Sakral Jerusalem ho hananu "Hosana, rahun diak ba ida ne'ebé mai lori Na'i nia naran" atu cumpri profeta Zacarais nia liafuan.( Zac. 9:9).

Koalia teologicamente, Ramos ne'ebé ita kaer signifika promessa Maromak nian no libertasaun. Jesus ne'ebé tama iha sidade Sakral Jerusalem reprezenta Jesus obedese ba Nia Aman nia plano, ho ninia commitmento ne'ebé sei lori salvasaun ba mundo.

Iha Domingo paixaun ida ne Igreja convida ita atu prepara ita nia an ba Semana Santa, hodi reflete hamutuk ho Jesus nia terus, mate iha krus no moris hias. Portanto;  paixaun de sufrimento, paixaun de Graça , paixaun domin nia, paixaun perdua malu,  no mos aktu reconsiliasaun ho Maromak  ita nia an, ema seluk no natureza.

Oinsa atu perpara an?

Sentru ba ita nia isin lolon mak ita nia fuan. Fuan ne’ebé nafatin halo funsaun ba ita nia isin lolon atu iha movimentu, fuan ida ne’ebé mak  book atu bele fo no fahe fuan domin nee ba ita nia maluk sira liu husi ita nia moris lor-loron katak halo buat ne'ebé ordinario  sai extra-ordinario, halo buat ne'ebé ita bele, fo buat ne'ebé ita iha, importante halo ho domin no halo didiak basa  Jesus ninia moris sai ezemplu hodi hatudu ona maneira domin lolos nian iha nebe Nia rasik  mate iha krus tanba hodomi.

Tan nee, ita hotu hetan convite atu prepara ita nia fuan hodi participa iha Semana Santa nia laran hodi hanoin fila fali Jesus ne'ebé iha foho Calvario, tahan terus ne'ebé Nia simu, experiencia hamlaha, moras, mesak nst. Terus sira ne lori ita atu hetan salvasaun no redensaun.

Ho razaun ida ne'e, ita continua fo tempo nafatin ba ita nia an ho Maromak hodi haklean ita nia relasaun ho Maromak no ho Maluk sira hodi aplika nafatin iha moris lor-loron nia Domin nebe ita simu ona no domin ida nee mak tenke fahe fali ba maluk sira.

Reflesaun Husi: Irmã Lucia do Carmo, OP

 

 

Kontinua Le'e

DALAN IDA HUSI KONDENASAUN BA ESPERANSA

 

 

DOMINGO BA DALA HAAT IHA TEMPO QUARESMA 

1a. Leitura: Is. 43:16-21 

2a. Leitura: Fip. 3:8-14 

Evangelho: Jo. 8:1-11

 

Moris nee hafutar an ho kór oioin wainhira ita konsiente didiak kada kor sira iha ninian sentidu rasik. Kór sira nee mak espresa sentimentu real mai husi fuan ne’ebé nakonu ho ksolok no domin. Husi sentimentu real nee haforsa ita atu iha koragem hare fila ba kotuk kura no hakuak ita nia experiência passado sira ho perdaun no hahu fila fali moris nee ho página foun hodi hateke ba futuru. Futuru ne’ebé nabilan hanesan fitun, maske iha nakukun laran nia nafatin fo naroman ba mundo. No fitun ne’e rasik labele fo naroman nabilan wainhira laiha nakukun. Tamba nee futuro ne’ebé nabilan processo liu husi nakukun depois lori naroman mai ba ema ne’ebé iha fiar metin no esperansa ne’ebé la bosok tamba Maromak larak luak domin Nain. Na’i nia laran sadia transforma ita nia fuan nakonu ho ksolok no esperansa rohan laek nian.

Evanjellu ohin nian Saun João aprezenta mai ita kona  ba istoria Jesus perdua feto sala-nain ne’ebe halo sala ho mane seluk. Ema Escrivão no Fariseu sira hakarak Jesus atu fo castigo ba feto ne’e tan tuir sira nia lisan hahalok hanesan feto halo nee tenki tuda ho fatuk to’o mate. Maibe Jesus responde ba situasaun ne’e differente tebes, duke tuir sira hodi fo castigo feto nee maibe Jesus husu sira atu examina ba sira nia an no fo tan opportunidade ba feto nee atu labele halo sala tan.

Iha moris laiha ema ida mak halo lós hela de’it no laiha sala. Ita hot-hotu iha ita nia sala ne’ebe ita hare’e no labele hare. Dalabarak wainhira ita halo sala ne’ebé bo’ot ema hare ita fo merese, hamnasa, hakribi atu hakbesik mai ita. Ita koko hakas an atu halo diak mos ema nafatin julga ita ho ita nia passado, ema julga ita tuir sira nia hanoin  ba ita nia experiência sira. Saida mak ita senti; senti moe, laiha koragem atu infrenta ema sira, lakoi atu hare ema nia oin, lakon esperansa no senti moris nee laiha ona valor. Maibe ita la hatene katak  iha Ema ida hein hela ita atu fila fali ba Nia, husu nia atu perdua ita nia sala sira, kura ita nia kanek sira,  renova ita nia fuan no konverte  ita nia an. Hirak nee hotu  liu husi sacramentu rekonsiliasaun ou konfesa.

Domingo ba dala lima tempo Quaresma nian, hanorin mai ita atu perdua malu, respeita malu, hadomi malu, hodi labele hare de’it ba ema seluk nia frakesa liu fali buat diak ne’ebé nia halo iha nia moris loro-loron nian. Tan nee iha Tinan Jubileu Peregriños de esperansa, momentu especial tebes mai ita, konvida ita atu sai husi nakukun laran hodi halakan ita nia ahi oan esperansa nian, hanorin ita atu labele tauk foti risku ba lialós no dalan los hodi hateke  ba futuro  ho vontade, koragem  no esperansa ne’ebé la bosok. Esperansa ida nee lori ita ba hasoru malu ho Maromak, tamba ho Maromak Nia laran sadía ita hotu hetan salvasaun.

Reflesaun Husi: Irmã Zelina Mendonça, OP

 

 

 

 

Kontinua Le'e

FILA FALI MAI DEIT UMA, AMAN HEIN HELA NO HADOMI NAFATIN!

 DOMINGO BA DALA IV TEMPU QUARESMA

 

1a. Leitura: Jos. 5:9a, 10-12   

2a. Leitura:2 Cor. 5:`7-21

Evangelho: Luke 15:1-3,11-32

Sentimento furak ida ita senti wainhira rona husi ema ida, aman ou inan, maun alin, belun, no maluk ruma wainhira dehan mai ita: ba dook karik ba keta haluha fila fali mai uma. Ita iha uma, fila mai deit. Liafuan sira ne’e halo ita senti katak ita pertense ba ema ruma, ita pertense ba familia ida.Moris ne’e atu diak liu ou a’at liu, ita la senti mesak tan ita senti iha ema hein no hadomi ita.

Domingo ba dala haat tempo quaresma nian haktuir mai ita kona ba aman ida ho oan nain rua. Kona ba oan mane ikun. Dala barak ona mak ita rona Kona ba istoria nee. Nia oan nbe koriojo teb-tebes husu nia rikusoin ne’ebé pertense ba nia maski nia laiha direitu nia revolto hodi husik hela uma buka liberdade tamba nia sente iha uma nee moris laiha liberdade ba nia ho pasensia nia Aman husik deit.

 Iha nia liberdade total nee mak nia hasoru desastre ne’ebé lori nia ba lakon rikosoin tomak ne’ebé nia aman fo ba nia. Nia sai kiak liu iha material no lakon buat hotu. Iha momentu buat hotu laiha ona mak nia foin conciente ka sadar katak buat hotu la furak hanesan iha hau aman nia uman. Buat hotu iha, .ema hotu moris diak, no hau mak iha nee sai atan. Ho aten brani nia dehan ba nia an katak hau tenki fila ba hau aman nia Uma maski sai atan.

Nia iha aripendimentu ba nia sala sira, nia dehan ba nia an:  hau precisa deit   domin  hau la precisa ona buat seluk. Nia aman simu duni fali nia hanesan heroi ida tamba nia aman hanoin katak nia oan aprende husi nia sala sira.

Kona ba oan mane boot nia atitude nee diak tebes iha nia aman nia oin nia la husu ga exige nia direitu kona ba rikusoin sira nia nunka revolto hasoru nia aman e nunka halai sai husi uma maibe obedese nain ba nia aman. Nia sempre hamutuk ho nia  aman iha uma besik nia aman maibe wainhra nia alin ne’ebé ba moris a’at hamout rikosoin hotu fila mai uma aman  ho liman rua simu nafatin nia oan mane ikun. Reasaun ne’ebé oan mane boot hatudu mak lakohi simu nia alin, revoltu hasoru nia aman no kontra nia aman, komesa sura nia kolen ba nia aman,komesa protesta nia dehan la justu, komesa halo komparasaun ba nia alin. Nia la rekonhese nia aman nia fuan ne’ebé nakonu ho osan mean. Oan mane boot laiha relasaun klean ho nia aman maibe iha deit mak kaan ba rikosoin sira la hare ba fuan.

 Ita halo komparasaun hahalok oan mane ikun no mane boot: oan mane ikun nee rekonhese nia an katak nia sala nain, hamrik husi nia sala no husu perdaun ba nia aman hodi dehan katak hau sala hasuru ita aman no sala hasuru Lalehan katak Maromak. Oan mane ikun brani hamrik husi nia monu nee hakarak sai diak. Atitude oan mane boot fali senti nia katak nia nunka halo sala no lakohi fo perdaun ba nia alin no lakohi simu nia alin, nee hatudu arogansia no loko an.

Husi pasagem Evangelho nee Ita Nain Jesus Cristo hanorin ita atu sai sarani lolos katak labele moris deit husi liur maibe precisa moris husi fuan no laran atu rekunhese. Ita labele moris hanesan ema fariseu no oan mane boot Nia hahalok hodi la simu Nia alin. Iha Ita Nia Moris Ita esperensia parte rua ne hotu sai hanesan chave atu Ita Moris iha transformasaun. 

Mai ita banati tuir oan mane ikun nia hahalok haraik an no hatene rekonhese katak nia halo sala hasoru Nia aman no Nia maun no buka hakarak halo diak nafatin. Ita nia Aman domin na’in hein nafatin ita atu fila fali ba UMA mesmu que ita ba dook no estraga buat hotu Nia fo no ita la recunhese Nia domin iha ita nia moris. NIA HEIN IHA UMA, FILA DEIT BA!Amen.

 

Reflesaun Husi: Irmã Alzira F. Dos Reis,OP

Kontinua Le'e

LIBERDADE MAI HO RESPONSABILIDADE

 3^o DOMINGU TEMPU QUARESMA

1a. leitura: Ex 3:1-81a, 13-15

2a. leitura: Cor 10: 1-6; 10-12

Evangelho: Lc 13:1-9

OhIn Ita tama ba Terceiro Domingo tempo Quaresma nian, ita simu bolu atu reflete kona-ba ita-nia moris iha Evanjelho nia roman iha moris ne’e Nai Maromak fo mai ita liberdade, maibe liberdade ne’e tenki akompanha ho responsabilidade. Ita hotu hili dalan oi-oin hodi bele moris maibe moris ne’ebe nakonu ho responsabilidade. Ne’e duni, iha tempo quaresma ida ne’e, Nai Maromak bolu ita, Nia haruka ita atu hadia ita nia an, hadia ita nia moris, hodi moris ho didiak no moris ho responsabildade perante ita ema nia liberdade ho espransa tomak.

Iha livro Exodo, fo hanoin mai ita  kona ba Nai Maromak Hatudu Nia an ba Moises hanesan ahi iha ai klobor ida nian tutun, Ne’e hatudu mai ita Esperansa ida katak Nai Maromak la husik ita mesak. Nai fo liberdade  mai ita be nudar nia ema sira, nia mosu ba Moises nudar dalan ida hodi liberta Isarael oan sira, husi liurai Farão nia liman, ho responsabilidade tomak atu povo ne’e bele hetan libertasaun iha Nai Maromak.   

Saun Paulo hateten ba ema Corinto sira katak povo Israel mak hetan Nai Maromak nia grasa iha rai fuik maran, maibe tamba sira halo sala, tan sira uza sira nia liberdade la ho responsabilidade. Ida ne’e inspira mos ita, tan ita goja ona Nai Maromak nia grasa ho dalan oi-oin, maibe buat ne’ebe ita precisa hola atensaun mak tenki responsabiliza ba ita nia liberdade ne’e rasik. Atu ita keta sai husi corridor fiar nian, hanesan ema fiar nain.

Hanesan aiknanoik konaba ai figeira ne’ebé la fo fuan, Nai Hakarak tesi tiha, maibe to’os atan iha esperanca boot iha Maromak nia husu atu fo tan tempo hodi nia bele halo ninia responsabilidade hodi tau rai metan se laiha rejultado mak bele tesi. Mai ita aprende mos husi to’os nain ida ne’e liu-liu iha tinan jubileu pregrino da Esperanza nian convida ita ida-idak, atu halo di’ak  hodi moris tuir ita nia fiar. Iha texto evangelho ne’e, Nai Jesus fo mai ita lisaun importante sira, hanesan Arependimento nudar forma ida husi responsabilidade ne’ebe klean liu. Tan wainhira ita konsiente konaba sala no pecado, ita hili dalan arependimento hakribi salan hodi fila laran ba Maromak. Iha ne’e mak momento lolos iha ne’ebé ita nia liberdade lolos hatudu ninia an iha Nai Maromak nia futar oin. Ne’e mak momento ida ne’ebé laos ita nafatin monu iha sala nia laran, maibe ita ba momento perdaun no transforma ita nia an lolos.  

Tempo quaresma ne’e, ita simu fali oportunidade diak ida atu bele hare didiak fali ita nia an, hadia ita nia hahalok, halos ita nia Fé ba Nai Maromak. Tan Liberdade ne’ebé Nai Maromak fo ba ita, sei sai grasa no bensaun wainhira ita uza didiak ho responsabilidade. Ita tenki hadia ita nia moris, hodi bele halao liberdade   ho dalan ne’ebé Nai Maromak rasik hakarak no laos ita ema nia hakarak. Amen

 

Reflesaun Husi: Irmã Gragiela do Nascimento, OP

Kontinua Le'e

RONA BA FUAN TAN JESUS KOALIA HUSI FUAN

 DOMINGO DAHULUK QUARESMA NIAN

1a. Leitura: Gen. 15:5,17-18

2a. Leitura: Fil. 3:17-41

Evangelho: Luk. 9:28b-36

 

Novedades ba Domingo daruak tempo quaresma, Jesus lori apostulo nain tolu sae ba foho atu halo orasaun. Wainhira sira harohan dadaun hela, derepente abu abu taka rai metin no sira rona lian ida hakilar dehan “ida ne mak hau nia oan doben, imi rona ni a ba.” Lian nee hakilar husi a’as nian mai husu ba mundo atu rona maibe mundo la fo fatin atu rona.

Tiempo quaresma fo oportunidade ba ita atu husik ita nia an livre hodi simu Jesus nia convite hodi lao hamutuk ho Nia, sai ba fatin dook no buka fatin silencio atu harohan.  Sai ba fatin dook significa, lao dook husi hahalok ladiak sira ne’ebé hakanek ema nia fuan. Buka fatin silencio, tanba iha nonok nia laran mak ita bele rona.

Rona ba fuan, tan fuan deit mak wee matan malirin ne’ebé naksulin mai ho oin ne’ebé midar, lian mamar no neon kman hodi lolo liman atu tulun hirak ne’ebé presija ajuda no ain la kole hodi lao hamutuk, hamaluk maun alin no inan feton sira.

Iha tinan jubileu Peregriños de esperansa, ita hotu hetan convite atu sai feto no mane ida ne’ebé sempre fo hatais ita nia fuan ho kor esperansa. esperansa hakerek ho ahí klak iha ema nia fuan, tan hakerek ho ahí klak entaun halo fuan manas no lakan, dudu ou lori sai, fo nabilan iha liafuan no hahalok, atrae ema barak nia fuan hodi foti iniciativa atu hakat ba oin.

Nudar gerasaun foun ida, hakarak convida mos belun gerasaun foun sira seluk atu husik ita nia ain fatin hakerek hela ho liafuan murak ne’ebé hari paz no unidade, husik hela ita nia ain fatin ho cor hirak ne’ebé fo haksolok no anima ema atu hakat tuir. ita hirak ne’ebé hakerek ona esperansa iha ita nia fuan, iha momento ruma kuandu tur mesak hare ba ema aa’t barak ne’ebé hakanek ema nia isin, emosaun no klamar, realidade hirak nee halo ita baruk, lakon vontade atu hakat ba oin.

Ita hare ba mundo ohin loron. ema komesa menus ona atu halo buat ne’ebé diak no ksolok ba ema hotu. Tanba nee ita nudar gerasaun foun nafatin hamrik metin ho ita nia posisaun nudar Peregriño de esperansa. nafatin ho hanoin ida deit katak iha situasaun saida deit gerasaun foun sei la lakon ánimo, alegría no esperansa. nia inti mak nee, RONA BA FUAN, TAN JESUS KOALIA HUSI FUAN.

Reflesaun Husi: Irmã Sara Mendonça, OP

Kontinua Le'e

ESPERANSA IHA MAROMAK NIA PROMESA SIRA

 DOMINGO DAHULUK QUARESMA NIAN (ANO C)

1a. Leitura: Dt. 26:4-10

2a. Leitura: Rom. 10:8-13   

Evangelho: Luk. 4: 1-13    

Domingo dahuluk Quaresma nian konvida ita atu hahu ita nia jornada fiar, konversaun no renovasaun nian. Leitura sira Domingo ne’e nian fo hanoin mai ita katak Quaresma ne’e la’os deit tempo penitensia nian maibe, tempo ida ne’ebe nakonu ho esperansa. Esperansa ne’e nia abut metin iha Maromak nia promesa sira, Maromak nia fidelidade no Maromak nia domin ne’ebe lori salvasaun mai ita.

Oinsa ita tenki hametin ita nia esperansa iha Maromak nia promessa sira?

Iha primeira leitura husi livro Deuteronomia aprezenta mai ita kona ba Moises ne’ebé fo instrusaun ba Israelita sira oinsa mak sira atu hasae buat karan ba Maromak ne’ebe mai husi sira nia servisu no sira nia kosar-ben. Buat karan ne’ebe sira hasae ne’e nu’udar sira nia gratidaun ba Maromak ne’ebe liberta ona sira. Leitura ne’e konvida ita iha tau esperansa iha Maromak nia promessa sira. Nune’e ita laran metin nafatin ba Maromak nia fidelidade iha momento hotu iha ita nia fiar sarani nian. Tan ne’e mai ita tau ita esperansa no konfiansa iha Maromak.

Iha Segunda leitura São Paulo koalia mai ita kona ba esperansa ne’ebe ita iha ne’e mai husi Jesus Cristo. Nia fo hanoin mai ita katak salvasaun ne’e oferese ba ema hotu ne’ebe iha konfiansa iha Jesus hodi bolu nia naran. Saida mak ita halo ona, ita nia kondisaun umana maske nakonu ho frajilidade no frakeja oi-oin maibe Maromak nia domin ne’ebe nakonu ho perdaun ne’e ita hotu bele simu. São Paulo afirma katak Maromak nia domin boot liu fali ita nia failansu no ita nia frakeja sira. Nia grasa sufisiente ona ba ita. Tanba ne’e ita presija iha nafatin esperansa iha Maromak nia promessa sira.

Iha evangelho, ita rona kona ba Jesus ne’ebe Espiritu lori ba rai-fuik maran, iha ne’eba nia halo jejum ba loron ha’at-nulu nia laran no diabo mai atu koko nia. Evangelho ohin hakarak hanorin mai ita katak Maromak nia Liafuan mak matadalan importante ida ne’ebé ita uza atu tulun ita manan hasoru tentasaun ba buat aat sira. Maromak nia liafuan sai hanesan we-matan esperansa nian ba ita. Jesus ne’ebe manan hasoru buat a’at sira fo hanoin mai ita katak ita mos bele manan hasoru tentasaun oi-oin ne’ebé ita hasoru iha moris, Ita bele manan hasoru sala no situasaun desesperado nian bainhira ita kaer metin no tau esperansa iha Maromak nia futar lifuan hodi luta hasoru laloran moris nian (tentasaun iha ita nia-an rasik, iha ita nia komunidade no iha ita nia rain, buat nebe importante liu mak ita iha esperansa nebe nakonu ho creatividade tuir Maromak nia lia fuan hodi bele kria ambiente extraordinario entre ita an rasik ho Maromak liu husi maun-alin sira)

Tempo Quaresma ne’e hanesan momento ida ne’ebé tama iha rai-fuik maran moris nian. Santa Kreda husu ita atu halo penitensia (jejum, absitinensia no karidade). Maibe ita mos sei atravesa tentasaun barak, maibe hanoin ba katak ita la mesak. Maromak la’o hamutuk ho ita iha momento ne’e, hanesan nia la’o ho povo Israel iha rai-fuik maran, no hamutuk ho Jesus iha tempo tentasaun nian. Mai ita haklean ita nia fiar no esperansa iha nia promessa sira no permite atu nia liafuan sira transforma ita nia fuan sira ne’eb é dalaruma iha dúvida kona ba Maromak nia plano mai ita nia moris.

Buat ne’ebé ita presija halo mak ne’e, atu intensifika ita nia vida orasaun nian. Hanesan Jesus iha rai-fuik maran, ita presija fo ita nia tempo atu iha uniaun ho Maromak Aman, se tilun hodi rona nia liafuan sira no buka nia vontade iha ita nia moris. Alem de ne’e, ita presija halo jejum, la’os deit jejum husi hahan sira maibe jejum husi buat sira ne’ebé hadook ita husi Maromak. Jejum tulun ita atu haketak ita nia an husi hakaran mundo nian no hodi tau atensaun tomak ba moris lalehan nian. Ikus, liu ita presija halo karidade, ne’eb é konvida ita atu lolo liman ba ema sira ne’ebé presija tebes ita nia tulun. Karidade halo ita sai Maromak nia sinal esperansa nian ba ema sira seluk. Nai Maromak haraik bensaun no hatudu dalan ba ita hotu durante tempo Quaresma nian.

 

Reflesaun husi:  Irmã Sabina Martins Mota.OP

Kontinua Le'e