BUAT HOTU COMESA HO LIAFUAN: NA’I NIA LIAFUAN HALO AN BA EMA. Reflesaun Natal 2020

BUAT HOTU COMESA HUSI LIAFUAN: NA’I NIA LIAFUAN HALO AN BA EMA.

Buat hotu comesa ho liafuan. Husi hau nia liafuan hau expressa saida mak hau hanoin no hateten sai saida mak iha hau nia ulun.

Iha evangelho saun Joao capitulo primeiro haktuir katak: Horiuluk kedas LIAFUAN iha nanis, LIAFUAN horik nanis ho Maromak; LIAFUAN mak Maromak.

Iha livro Genesis haktuir mai ita oinsa Na’I Maromak halo lalehan no rai ho ninia liafuan sira and ninia liafuan sira mak… NA’I DEHAN… HALO TUIR NUNE’E… NO MOSU MAI

Aman Maromak la’os koalia deit, Nia koalia no cria mundo no ikus mai nia cria ema, feto no mane.Nia hadomi los sira, maibe sira monu ba tentasaun. Biar nun’e Na’I Maromak continua hadomi sira no promote atu haruka maksoin atu mai. No atu halo tuir ninia liafuan sira mak Nia haruka Nia oan mane mai iha mundo. Ida ne’e mak razaun tansa ita celebra natal.

Realidade triste ba ita ema katak, ita la cunhese Nia. Saun Joao continua dehan iha ninia evanjelho katak Nia mai ba Nia emar sira maibe sira la simu Nia.

Maromak cria mundo atu ema hotu moris ho haksolok maibe realidade momos hatudu mai ita katak riku soin mundo nian nasaun poderoso balun mak controla nebe la bele to’o ba ema hothotu.Ema balun riku ba beibeik, barak mak sei kiak rabat rai.

Iha ita nia mundo ohin loron, ema barak mak sei terus husi violasaun oin-oin, ema barak hamlaha, barak mate la’os deit tamba moras maibe mate mos tamba desatre naturais oin-oin. Barak sei luta ba justisa no ba sira ninia direito, balun serbisu maka’as no haka’as an atu hetan moris diak. La’os ida ne’e det,  iha tinan 2019-2020  mundo tomak hasoru los pandemia covid 19 nebe halo ema barak moras no mate. Nune’ e ema balu husu Maromak iha nebe?

Ema barak buka Maromak maibe Na’I Maromak iha ne’e ona. Nia hamutuk ho ita. Nia mak Emmanuel, Nia horik ho ita, nia hamutuk ho humanidade nebe terus maibe ita nia matan no fuan mak seidauk nakloke atu simu Nia.

Sei ita fiar katak Nia iha ita le'et, hasoru situasaun pandemia ida ne’e, ita koko sai instrumento atu cura ema ninia moras liu husi ita nia liafuan no hahalok sira no hatudu  solidario ba maun alin sira nebe sei terus hela hanesan papa Francisco dehan mai ita: iha natal 2020 ida ne’e sai opportunidade ida atu ajuda sira seluk sem  reklamo.

Hau le’e istoria natal nian ida nebe furak tebes haktuir husi Arcebispo Fulton Sheen, SJ katak:

Iha kalan ida,  iha anin kalan nian nebe hu'u haleu foho Belem nian, iha tanis oan ida, tanis neineik deit. Laloran tasi nian la rona tamba nia barulho tebes. Raiklaran mos la rona nia tan sei toba hela. Ema sira ho kbiit maka’as mos la rona nia tan sira la kumprende katak labarik ida sei sai Ema boot ida. Iha ema oin rua deit mak rona tanis iha kalan ida neba: bibi atan sira ho ema matenek nain tolu. Bibi atan sira mak sira nebe la hatene buat ida no ema matenek sira mak sira nebe hatene katak sira la hatene buat hotu. Bibi atan sira hetan sira nia bibi atan diak no matenek sira hetan sabeduria no sabeduria ida ne’e mak kosok oan nebe latan hela iha duut laran”.

Atu tutan ho istoria furak ida ne’e, ami nia Irma coordenadora geral, Irma Raquel Gil, iha ninia mensagem natal nian bele  penetra iha ita nia fuan, nia dehan mai ita katak: iha natal ida ne’e hanesan bibi atan sira, convida ita atu hare ba Na’I Kosok oan ho matan domin nian tanba liu husi ida ne’e deit ita bele kumprende misterio inkarnasaun nian.Na’I Maromak halo An ba ema. 

Sei natal ida ne’e la sai esperensia, la fo moris, laiha ternura no compromisso iha ita, ita sei hela ho mundo ida nebe nakonu ho intensaun diak det , hela ho  ideas nebe ita hatene ona no sei repete ba nafatin. 

Katak ita nia liafuan sira sei laiha folin  se ita la hatudu iha ita nia aksaun konkreto hodi ajuda cria mundo ida nebe diak liu, mundo ida nebe nakonu ho kompaixaun. Husik ita nia Liafuan bele sai isin iha ita nia ejemplo moris lor-loon nian. 

Husik Jesus tama iha ita nia fuan atu ita bele sente ema seluk nia terus no rona sira nia halerik nune’e ita bele hatene sai umano lolos no realize katak sem ema seluk ita labele halo buat ida ho nune’e ita bele fo valor ba fraternidade universal katak ita sai hanesan comunidade ida, familia ida, familia Maromak nian.

Hamutuk ho bibi atan sira nebe la hatene buat ida no ema matenek sira nebe hatene katak sira la hatene buat hotu ho haraik an mai  ita simu Nia ho ksolok atu ninia sabeduria bele iha esperansa nafatin hodi continua celebra natal iha ita nia moris lor-loron nian mesmu ita hasoru situasaun deficil iha momentu ida ne’e. Nia Liafuan halo an ba ema. Nia Iha Ne’e. Nia mak Emmanuel. Na’I horik ho ita.Nia hamutuk ho ita iha ita nia moris lor-loron. Loke odamatan fuan nian atu husik nia tama no horik iha neba.

Ho Ksolok mai ita celebra ita nia Maksoin nia loron moris.

By: Sr. Fatima Pui, OP