SOLENIDADE DE SANTA MARIA, MAROMAK NIA INAN
Dia 1 de Janeru 2021
Hau hahu hau nia reflesaun ho insidente nebe acontese iha loron 30 de Outubro 2020 iha aldea terra santa, Comoro iha nebe Domingas soares, inan ida nebe mate tan defende nia oan feto husi tentative violasaun sexual. Inan ida nebe brani fo nia an ba mate atu defende ninia oan feto husi perigo no hakarak salva nia oan feto nia moris.
Ida ne’e tragedia ida maibe atu hatudu mai ita katak laiha domin ida boot liu fali domin inan nian. Nia la tauk atu fo an ba mate atu salva nia oan feto. Ida ne’e ejemplo ida husi domin lolos inan nian. Ita bele dehan se iha domin ida boot liu fali domin inan ida nian?
Ita hotu iha inan no ita esperencia inan nia domin mai ita. Hau fiar katak domin lolos nebe ita simu iha mundo ne’e mak inan nia domin.
Nain feto sai inan mos ba Jesus. Nia sai Maromak nia inan atu hatudu mai ita katak biar Jesus Maromak oan, nia mos senti domin inan nian wainhira nia sei iha mundo. Nai maromak haruka Nia oan mane liu husi inan ida nebe haktuir mai ita iha carta saun Paulo ba Gálatas nebe katak: “Maibe wainhira tempu to’o ona, maromak haruka nia oan mane, nebe moris husi feto no moris iha ukun fuan nia ukun atu hasai sira nebe iha ukun fuan nia ukun, atu sira bele sai Maromak nia oan.”
Nain feto kous no tur ahi ba Jesus Maromak oan maibe nia mos ladun kumprende Nai Maromak Nia plano lolos ba nia maibe hanesan evanjelista saun Lukas dehan mai ita katak: “Nia rai buat hotu iha nia fuan”.
Dala barak ita ladun kumprende buat barak iha moris, ita labele uza deit ita nia ulun maibe Nain Feto hanorin ita atu rona ho ita nia fuan. Iha neba ita sei kumprende misterio moris nian. Ita nia fuan mak sai centro ba ita nia moris. Wainhira iha inan ida, domin mos iha neba.
Iha celebrasaun ida ne’e mos ita hanoin papel importante saun Jose nian iha Jesus ho nain feto nia moris. Historia salvasaun nia sei la acontese sem saun Jose. Papa Francisco fo sai tinan 2021 sai hanesan tinan saun Jose comesa husi loron 8 fulan decembro 2020 to’o loron 8 fulan decembro 2021.
Iha ninia carta apostolico ho titlu: “ Patris Corde”( Ho Aman nia fuan) Amu papa descreve saun Jose hanesan aman domin nain, ho fuan mamar, aman nebe obediente, aman nebe brani no serbisu maka’as.
Iha document ida ne mos Amu papa ajuda ita iha tempu pandemia covd 19, atu hare importancia husi ema baibain sira nebe ho pacensia no ofrese esperansa iha moris lor-loron. Ho ida ne’e saun Jose ninia prezensa hanesn mane ida nebe ema ladun hare lor-loron, nebe subar hela maibe iha role importante ida iha istoria salvasaun nian.
Hanesan oan husi ita nia inan aman, ita barak mak senti besik liu ba ita nia inan sira maibe sei aman laiha, inan mos sei laiha. Saun Jose hatudu mai ita ejemplo aman domin nain nian. Aman nebe la koalia barak maibe fiel nafatin ba Nain Feto ho Jesus. Nia hadomi Jesus hanesan Nain Feto hadomi nia.
Hau rona istoria ida husi nailulik ida dehan katak: hakuak inan nia diak tebes maibe aman nia hakuak tama iha categoria oin seluk nian.
Mai ita hahu tinan 2021 hodi fo agradese ba Maromak ba nia fidelidade no domin nebe rohan laiha liu husi domin nain feto no saun Jose.
Reflesaun Husi:
Irma Fatima Pui, OP
0 comments:
Post a Comment