Hametin fiar no haraik-an hodi haklaken Evangelho.

Domingo advento daruak nian

Primeira Leitura: Is.  40:1-5, 9-11

Segunda Leitura: 2 P 3:8-14

Evangelho: Mk. 1:1-8 

HAMETIN FIAR NO HARAIK-AN  HODI HAKLAKEN EVANGELHO.

Reflesaun husi: Irma Felizarde Mariana dos Santos

Ohin ita tama ba Domingu advento daruak, Evangelho ohin iha São Markus foti husi Profeta Isaias katak “lian be hakilar iha rai-fuik maran: ‘hadi’a Na’i nia dalan, halόs nia dalan terik!” (Mk 40:3) ida ne koalia kona ba Joao Baptista no ninia ministériu. Nia maka Kristu nia manu-ain atu mai uluk Nia hodi prepara dalan los ba Nia. Nune’e hau nia reflesaun ohin nian hau hakarak atu hatudu frase haat nebe maka importante liu, hanesan tuir mai ne:  atu sai Ninia manu-ain/mesenjeiro, atu troka ita nia moris, haraik-an, nakloke an ba Espiritu Santu.

Sai Kristu Nia manu-ain ne katak atu sai nu’udar Ninia lian tan ne’e halo tuir saida maka Joao Baptista halo iha evangelho ohin nian. ita nu’udar sarani katolika tenke sai Joao Baptista tuir mai, atu nune’e bele sai Profeta nebe mak iha kualidade hodi haklaken Nain nia evangelho ba nia emar sira liu-liu ema sira nebe maka presija liu. Maske situsaun agora ne mak troka buat hotu maibe ita tenke book an hodi lao ba oin nafatin hodi servi nia emar sira liu husi dalan oin oin. Hodi too ema sira nebe maka presija loss tamba ita mak Nai nia instrument tan ne, ita la lakon esperansa maibe fiar metin nafatin ba Nia hodi haklaken Nain nia liafuan diak ba mundo. 

Tempu Advento  fo hanoin beibeik ona mai ita atu troka ita nia  moris hodi nune’e ita bele hamamuk fatin ba Nia.  Entaun saida mak ita presija prepara atu hein Kosok oan Jesus?

Situasaun agora nebe ita enfrenta dadauk nian katak mundu tomak afekta hotu tamba Virus Korona, ita nia moris troka total kedas, ida ne mos fo vantagen ba ita tamba hanorin ita sai ema nebe domin nain, unidade no buat seluk tan, loke ita nia matan hodi hare saida mak akontese iha mundu. Tan ne’e ita tenke iha mudansa hodi lao ba oin. 

Oinsa ita bele troka ita nia hahalok no mudansa ne liu husi sakrametu  rekonsiliasaun no husu perdua ba Nai ba buat hirak nebe maka ita halo iha tempu uluk tamba tempu adventu ne oportunidade diak mai ita para atu prepara-an no fó liman ba malu hodi prepara hela fatin mamuk ba kosok oan Jesus nebe atu mai tempu natal nian. 

Lisaun ohin hau aprende iha evangelho Markus nian maka virtude ho haraik-an tamba ne maka xave ida atu komprende liu tan iha tempo advento ne ninian. Entaun wainhira ita ho haraik-an hodi haklaken Nain nia liafuan diak ita sei manan buat hotu. Tan ne evangelho ohin nian Joao Baptista fo exemplo diak ba ita mosmos, ita tenke haraik-an no loke ba Nain nia graca, vontade no Espiritu Santu atu molde ita nafatin.

Domingo ida ne ita sunu lilin Segundo adventu nian, ne reprezenta Fiar. Ida ne’e bolu “Lilin Belem nian” hanesan relembra fila fali Maria no Jose sira nia viajen ba Belem. Nune’e ema fiar nain mak sira nebe sempre esforsu an hodi halakan naroman iha nakukun laran iha moris lor-loron nian. Sira konsiente katak sira ema fraku maibe sira esforsu an nafatin atu moris iha grasa Maromak nian. Esperansa mak liafuan save ba sira. Naroman no esperansa ba ema fiar nain mak Jesus Kristu, ita nia Mesias.