Ita hotu hatene katak depois de festa natal, kreda katolika celebra festa da Sagrada Familia. Festa ida nee aprensenta mai ita figura ba Saun Jose, Nain feto no Kosok Oan ita Nai Jesus Cristo.
Sagrada familia halibur hamutuk tan iha obedencia no iha humlidade. Maria hatan ba anju atu sai Maromak nia inan no Saun Jose simu Maria hanesan nia kaben. Liu husi sira nia obedensia ba Maromak, sira forma familia ida nebe ita hotu hatene hanesan familia nazare.
Hau iha istoria ida atu konta ba imi. Istoria ida ne’e haktuir nune’e: Iha tia ida naran Josefa nia katuas oan naran Marcos sira nain rua iha oan ida deit naran Jaime. Sira hela iha foho. Sira nia moris tenke fila liman ( faan modo ) hodi hetan osan oitoan nune’e bele sustenta sira nia moris. Lor -loron tia Josefa ho tiu Marcos tenke tun mai Dili hodi faan modo, dalaruma folin no dalaruma mos la folin. Loron ida sira han dala rua deit. Maibe sira nain tolu sempre kontente ho buat nebe sira iha no sempre agradece ba Maromak ba moris nebe haraik ona ba sira.
Liu husi istoria badak ida ne’e atu fo hanoin mai ita hotu katak maski ita moris iha familia nebe Riku ou kiak importante moris iha domin no ksolok nia laran. No sempre fo agradece ba Nai Maromak ho grasa nebe ita simu lor loron.
Iha Maromak nia liafuan sira ohin loron nian fo hanoin mai ita kona ba fundasaun familia sarani nian : DOMIN BA MAROMAK NO DOMIN BA EMA SELUK liu liu ba sira nebe besik liu ita ; hanesan ita nia Inan aman, maun alin sira hotu.
Na’I Maromak nia liafuan haktuir mai ita nune’e : oan sira tenke hatudu atitude ou hahalok diak hasoru inan aman sira. Husi hahalok diak sira ne’e mak sei hetan grasa husi Maromak.
Grasa Maromak nian mak halo familia moris iha Ksolok no hatene hadomi no nebe ita hato’o domin nebe ita iha tenke mai husi ita nia fuan laran no hatudu iha jestu/ aksaun. Liu husi; kompaixaun, komprensaun, laran diak, respeita, no fahe/ partilla ita nia moris ho ema seluk.
Liu husi messagen sira ne’e lori ita atu reflete no fiar katak Familia mak abut kreda no nasaun nian, no iha familia laran entre aman, inan no oan sira presica tau matan no hadomi malu.
Hanesan Familia, fahe domin ba malu, moris iha unidade no iha obedencia ba Maromak no ba familia uma laran no mos maluk sira, familia ida ne’e moris tuir modelu familia Nazare.
Hakerek Husi:
Irma Alda B. de Carvalho Soares, OP
0 comments:
Post a Comment