DOMINGO XXV TEMPO BAIBAIN NIAN
1a. Leitura: Am. 8, 4-7
2a. Leitura: 1 Tim. 2, 1-8
Evangelho: Lk. 16- 1-13 ou 10-13
Maun alin sira mak Kristu hadomi! Iha primeira leitura, segunda no Evangelho haktuir mai ita liafuan koaze hanesan liu-liu hanorin ba ita sarani idaidak atu fiel ba Maromak ninia hanorin sira tanba dala barak ita dehan ita haknaaran nudar sarani maibe ita nia nia atitude sira la kumpri ou la halo tuir.
Hanesan iha primeira leitura hanorin ita atu labele halo diskriminasaun ka halo injustisia ba povu kbiit laek sira maibe buka atu serbisu hamutuk ho sira no fo valor mós ba sira tanba ita mesak maun alin iha Kristu Jesus presiza ajuda malu ida ne'e mak importante teb-tebes. No iha segunda leitura hanorin mai ita atu fo agradese, ketahaluhan harohan hodi halo orasaun. Baibain akontese mos iha ita nia moris nudar sarani ho ita idaidak nia preokupasaun oioin dala barak ita la fo tempu uitoan ba Maromak ne'e duni liu housi leitura ida ne'e loke mos ita nia neon atu ita mos buka tempu hodi reza no hakbesik liu tan ba Maromak tanba Nia mak ita nia moris hun no rohan.
Iha Evangelho São Lukas haktuir mai ita katak, IMI LA BELE SERBI NA'I MAROMAK HODI SERBI MÒS OSAN. Liafuan hirak ne'e atu dehan katak, Entre rua ne'e ita bele fiel ba ida deit ne'e duni Jesus konvida nafatin ita atu hili buat nebe fo moris ba ita tanba vida ida ne'e laos iha rai ne'e deit maibe hanoin mos vida ida ne'ebe mak sei lori ita ba loron ikus nian. Ne'e duni ita nudar sarani importante fiel nafatin ba Maromak Nia mak sei leno nafatin ita dalan to'o rohan presiza deit ita nia hakas a’an.
Reflesaun Husi: Irmã Maria de Fatima Sequeira, OP
0 comments:
Post a Comment