NIA FILA KEDAS HODI HAHÍ MAKA’AS MAROMAK

 

DOMINGO BA DALA XXVIII TEMPU BAIBAIN  NIAN

Primeira Leitura : 2 Rs. 5, 14-17

Segunda Leitura : 2 Tim. 2, 8-13

Evangelho : Lc. 17, 11-19

 

 

              Ohin ita tama ona ba domingo vigesima oitava tempo comum nian. Iha leitura sira ohin loron nian fo hanoin fali mai ita kona ba fiar no gratidão.

                Iha Jesus nia tempo no iha ita nia tempo ohin loron mos hanesan, leproso sira ema hakribi tamba ema konsidera sira ema foer. Nune mak iha evangelho ohin nian, leproso sira bolu Jesus atu sadia sira ho nune mak lao tuir dalan sira hetan fali isin diak maibe sira nain sanulu be hetan isin diak so iha ida deit mak fila fali ba Jesus hodi agradese ba grasa isin diak nian, no nia ema samaritano ida.

              “Ó nia fiar mak soi ó” Jesus dehan ba Samaritano nebe hetan kura. Ida ne’e laos foin primeiro Jesus tenik kona ba fiar nia forsa maibe dalawain ona iha evangelho tamba fiar mak necesario ba milagre ne’ebé akontese.

                As vezes, wainhira ita iha situasaun nebe diak no hakmatek ita sai haluha dor, ita haluha atu agradese ba Maromak ba grasa nebe ita simu barak ou itoan. Ida ne’e mak akontese ba leproso nain sia.

               Ita hare katak entre leproso nain sanulu ne so iha ida deit mak fila fali ba Jesus hodi hato nia sentimento gratidão nian. Ksolok hetan kura husi Nai bok mos samaritano ne’e nia a’an hodi hahi no fo gloria ba Nai ho lian makas. Furak tebes atu hare ema nebe mak la tauk atu hahi Maromak no proklama Maromak nia diak tomak be halo iha nia moris.  

                    Hanesan leproso nain sanulu, ita mos dala barak hetan kura no hetan bensaun oioin iha moris lorloron maibe ita balu deit mak hatene agradese no fo sentido gratidão nian ba diak tomak nebe mak Nai halo mai ita. Espera Nai nia liafuan ohin loron nian bok ita hotu nia fuan hodi iha laran luak hanesan Jesus no fiar metin no agradese hanesan leproso Samaritano nian ne’e.

 

           Reflesaun Husi: Irmã Rosita Carvalho da Costa, OP