Fiar importante atu hala'o servisu Maromak nian

 

DOMINGO BA DALA XXVII TEMPU BAIBAIN NIAN

1a. Leitura: Hab. 1:2-3;2:2-4

2a. Leitura: 2Tim.1:6-8,13-14

Evangelho: Lk. 17:5-10

 

    Evangelho ohin ita rona  Jesus hanorin kona fiar no servisu ba Maromak. Iha contexto ida ne’e sai hanesan diálogu entre Jesus ho nia estudante sira no ema hirak nebe tuir nia, kona ba lala’ok no sai oinsa los wainhira ita hola parte hodi sai nu’udar discipulo Jesus nian.

   Jesus hanorin no fo dalan ba nia escolante sira kona ba sala no perdaun. ita hare iha nee Nai Jesus nia hanorin rua mak kait malu ne’ebé nia ofresse ba nia discipulo sira wainhira sira hasa’e lia ba nia hodi husu atu aumenta no haforsa sira nia fiar.     

    Primeiro nia fo hanoin kona ba buat ne’ebé familiar teb-tebes mai ita katak fiar ne’ebé kiik oan ou oituan sei guia ita atu halo buat ne’ebé furak no kmanek. Ho coragen simples ne’ebé Nai Jesus hanorin lori ita atu buka ita nia fatin hodi hamrik metin atu haburas ita nia fiar iha nia aman nia domin.

     Segundu Nia halo ita atu hatene tuir kona ba planu Nia Aman ninian ba ita nee saida no saida mak ita atu halo.  Ho ida nee nia escolante sira hatene hela sira an katak sira nee atan ba planu Maromak ninian.

     Maske Maromak halo buat diak no furak oi oin liu husi ita ho fiar ne’ebé hanesan mostarda musan, maibe buat hirak nee ita halo, laos buka para hodi ita nia maluk seluk hare hodi sura no aprecia ita nia servico. maibe buat hirak nee ita halo hodi participa iha planu Maromak nian nuudar graça ida ba ita, katak laiha mak liu no laiha mak menus.

    Wainhira graça ne’ebe ita iha, hodi uza atu coopera ho Maromak liu husi servisu ne’ebé ita halo, laiha mak liu ita nia obrigasaun  Moromak hanesan fiar nain ida. Maibe ita nia fiar halo ita no lori ita atu fiar katak, saida maka ita oferese iha serviso Maromak nian nu’udar nia atan bele halo no produz barak liu tan.  

Reflesaun Husi:Irmã Cacilda de Fatima, OP

 

Kontinua Le'e

LORON IDA MOS ITA SEI MATE

 

DOMINGO XVI TEMPO BAIBAIN NIAN

                                                   

 

    1a. Leitura: Amos 6.La 4-7

    2a. Leitura: Tim 6 .11 -16.

    Evangelho: Luc. 16 -19-31.

 

    Maluk sarani doben sira, ohin ita tama ona ba Domingo XVI  tempo Commun  fo hanoin mai  ita  atu rona  ba leitura  sira no evangelho Saun Lucas nian ne’ebé koalia kona ba ema rico  ida no  ema kiak ida ho naran Lazaru ne’ebé moras no hasoru hamlaha  boot. Nia hahan sira mak hahan ne’ebé monu hosi meja leten nia hili hodi Han, nia kanek sira la hetan kura hosi ema ida  asu mak lambe hela nia kanek sira.  Ema kiak ne’e  presija tebes  ema  rico ne nia tulun , maibe ema rico ne’e la’o liu husi nia oin hare deit, nia hakribi  ema ne’e. Fim husi istoria Lazaro mate ba kedas lalehan maibe ema riku ne’e mate hasoru terus tan iha nia moris nia goja no haluhan katak loron ida mos nia sei mate.

          Maluk sira esperiencia ida ne’e ita mos hasoru iha ita nia moris lor loron  hakarak buat hotu ba ita nia an rasik deit,  la hanoin maluk sira seluk  ne’ebé presija ita nia tulun. Ita tau  liu importancia ba ema nebe ita gosta hodi ignora ida nebe ita lagosta no halai ses hosi situasaun sira hanesan nee.

    Rikusoyn ita bele iha  maibe  oinsa ita uja rikusoyn ne’ebé ita iha? Saida mak importante liu mak ita iha hahalok diak, iha laran kmaus no laran luak atu fahe ho ema seluk. No tenki hanoin katak se ita riku la’os ita mak diak liu ona hodi la hare ba ita nia maluk sira seluk. Rikusoyn sira ita sei la lori wainhira ita sei fila fali ba Aman Maromak nia uma.

   Mai ita moris tuir Jesus ninia hanorin sira hodi hatudu compaixão ba ita nia maluk sira liu-liu sira sei moris iha susar no terus nia laran, nune’e ita sei hetan premiu iha moris rohan laek nian.

 

Reflesaun Husi:

Irmã Sabina Gonzaga, OP

Kontinua Le'e

"IMI LA BELE SERBI NA'I MAROMAK HODI SERBI MÓS OSAN."

 

DOMINGO XXV TEMPO BAIBAIN NIAN

1a. Leitura: Am. 8, 4-7

2a. Leitura: 1 Tim. 2, 1-8

Evangelho: Lk. 16- 1-13 ou 10-13

 

  Maun alin sira mak Kristu hadomi! Iha primeira leitura, segunda no Evangelho haktuir mai ita liafuan koaze hanesan liu-liu hanorin ba ita sarani idaidak atu fiel  ba Maromak ninia hanorin sira tanba dala barak ita dehan ita haknaaran nudar sarani maibe ita nia nia atitude sira la kumpri ou la halo tuir.

   Hanesan iha primeira leitura hanorin ita atu labele halo diskriminasaun ka halo injustisia ba povu kbiit laek sira maibe buka atu serbisu hamutuk ho sira no fo valor mós ba sira tanba ita mesak maun alin iha Kristu Jesus presiza ajuda malu ida ne'e mak importante teb-tebes. No iha segunda leitura hanorin mai ita atu fo agradese, ketahaluhan harohan hodi halo orasaun. Baibain akontese mos iha ita nia moris nudar sarani ho ita idaidak nia preokupasaun oioin dala barak ita la fo tempu uitoan ba Maromak ne'e duni liu housi leitura ida ne'e loke mos ita nia neon atu ita mos buka tempu hodi reza no hakbesik liu tan ba Maromak tanba Nia mak ita nia moris hun no rohan.

  Iha Evangelho São Lukas haktuir mai ita katak, IMI LA BELE SERBI NA'I MAROMAK HODI SERBI MÒS OSAN. Liafuan hirak ne'e atu dehan katak, Entre rua ne'e ita bele fiel ba ida deit ne'e duni Jesus konvida nafatin ita atu hili buat nebe fo moris ba ita tanba vida ida ne'e laos iha rai ne'e deit maibe hanoin mos vida ida ne'ebe mak sei lori ita ba loron ikus nian. Ne'e duni ita nudar sarani importante fiel nafatin ba Maromak Nia mak sei leno nafatin ita dalan to'o rohan presiza deit ita nia hakas a’an.

 

Reflesaun Husi: Irmã Maria de Fatima Sequeira, OP

 

 

 

Kontinua Le'e

PECADO SEI NAKFILAK BA BENSAUN LIU HOSI DALAN CONVERSAUN

 

Domingo XXIV Tempo Commun

1.   Leitura  Ex. 32,  7-11,13-14

2. Leitura   1 Tim. 1, 12-17

Evangelho  Lc. 15, 1-32

    Belun sira  mak Cristo hadomi, Evangelho domingo ne’e  nian toca ita nia fuan  atu reflete kona ba Pontus significantes tolu mak, Matematika ema nian, Matemaktika realidade moris actual, Matematika  maromak nian.

   Matematika ema nian,  buat ne’ebé iha ba moris iha ona, maibe sei buka atu aumenta ,la’os buka ida ne’ebé lakon maibe buka manan atu bele mantein quantidade moris laos qualidade fiar. matematika humana mak laos buka buat ne’ebé boot  hahu hosi kiik, maibe sempre iha mehi ne’ebé a’as atu atinge buat nebe boot hahu husi buat boot. Matematika ema nian mak sempre buka diak ba nia an rasik do que haluha an rasik hodi buka diak ba ema seluk nia moris diak.

    Realidade moris actual,  iha ita nia nia moris dala ruma ita barak iha ona esperiensia kona ba lao sala dalan.  Experiensia lao sala dalan mak  realidade  ne’ebé susar atu resolve, karik ita la nakloke atu husu tulun hosi ema seluk. Tanba nee wainhira ita lao sala dalan ou lakon hanesan bibi ne’ebé lakon ita presica deit mak humildade no curiozidade atu moris tuir Maromak nia vontade  nune’e bele moris ho domin moris iha domin  tanba ita moris husi domin Maromak nian.

   Matematika maromak nian mak,  Maromak la baruk atu  buka ida  ne’ebé lakon nakohu ho domin. Maromak sei alegria , wainhira ida nebe lao sala dalan reconhese sala hodi fila fali ba dalan moris  nebe los. Significa ba maromak numero kiik mak sai fator determinante ba existencia ba numero boot. Maromak nia misericordia no amor sulin la nahas ba ema sala nain representa bibi ida  nebe lakon.  ”hau dehan ba imi katak iha lalehan sei haksolok tanba ema maksalak idanebe  hakribi  nia sala, liu fali ema diak sia nulu resin sia nebe la kuran atu hakribi sala” ( Lc 10,7 ).  Tanba ne’e mai ita aprende housi metofora domin Jesus nian, ho oinsa ita buka no aprende hodi lori fila fali  ita nia belun sira ne’ebé la’o sala dalan ba maromak nia uma. Basá Maromak nia domin universal, domin justo no Maromak mai ba ema hotu.

 

Reflesaun Husi: Irmã Zelia dos Reis, OP

Kontinua Le'e