IHA FATIN NE’EBÉ HAU HELA, IMI MOS SEI HELA BA

 

 

DOMINGO BA DALA VII PASCOA

SOLENIDADE DA ASCENÇÃO DO SENHOR

 

1a. Leitura: Apos. 1:1-11

2a. Leitura: Ef.  1:17-23

Evangelho: Mat.  28:16-20

 

Maun alin doben iha Kristu,  ohin igreja selebra loron importante ida iha sarani hotu nia moris; selebrasaun ne’ėbé hanaran Ascenção do Senhor ka Jesus sae ba lalehan momentu ne’ebé maka istoria fiar nian, liu tiha Ninia moris hias husi mate Nia sae ba lalehan iha Aman nia Gloria ho Ninia kbiit rasik. Nia husik hela iha mundo,  husik hela Nia eskolante sira maibe la’os atu halo eskolante sira sai oan kiak basà nia promete tulun nain ba ita ida-idak.

Jesus ba lalehan hodi prepara fatin furak ida ba ita, fatin hakmatek rohan laek nian ne’ebé ita sei horik iha ne’eba iha ita nia loron ikus no fo sasin mai ita katak lalehan mak ita nia destinasaun rohan laek nian iha loron ida basa ita nia fiar , fiar ba moris hias nian iha loron ikus tan  iha han kalan ikus nian Jesus hateten hela liafuan ikus nunee “ Hau sei mai fali atu lori imi mai hamutuk ho Hau iha Hau nia fatin, iha nebe Hau hela imi mos sei hela ba.

            Iha primeira leitura ita rona iha apostulu sira nia hahalok hatoo mai ita oinsa Jesus ba lalehan no promete hela nia Espiritu Santu nu’udar tulun nain ne’ebé  sei mai guia ita no haforsa ita nia viagem iha mundu nee ne’ebé sei lori no lao iha dalan misaun nian ne’ebé ita hotu sei fo sasin hodi haklaken liafuan diak. Jesus mai husi lalehan no nia fila fali ba lalehan nunee mos ita laos mundu nee nian tan nee ita nia moris laos kesi ba sasan mundu nee nian.

 Iha segunda leitura kona ba apostulu saun paul nian ba sarani sira iha Éfeso koalia kona ba oinsa Jesus hatudu nia an ba igreja no ba ita hotu; revelasaun neebe lolos iha nia Gloria buat hotu neebe nia hanorin mai ita mak oinsa ita fiar iha kristu ita Nain no nia fo hanoin mai ita atu fiar iha Jesus Kristu ne’ebé nuudar Maromak nia Oan lolos basa liu husi moris hias no sae ba lalehan Nia hatudu mai ita kona ba lalehan nia Gloria rohan laek.  Ida nee fo hanoin mai ita katak ita nia fiar la lakon leet deit basa kreda nia istoria fiar nian manifesta mai ita iha Ninia moris santu hotu. Iha evangelhu saun Joao nian hatoo mai ita katak Nia haruka ita atu kontinua haklaken Jesus nia naran ba fatin hotu-hotu.

Tan nee, maun alin sira ho ita nia selebrasaun Jesus sae ba lalehan no oinsa ita  nia misaun ohin loron nian mak evanzelizasaun iha tempu ohin loron, misaun importante ba ita nia an hadia ita nia igualidade moris nuudar sarani.  Ita harohan atu ho Maromak nia Gloria lalehan nian kontinua hatudu dalan mai ita no nafatin fo inpirasaun liu husi nia Roman lialos no domin nunee ita hakas an nafatin atu sai eskolante ne’ebé diak iha mundu ohin loron. Tan Sentru husi viajem mundu nee nian mak dalan ba lalehan. Durante loron haatnulu nia laran liu tiha Jesus nia moris hias Nia sempre mosu ba eskolante sira atu enkoraja sira, hametin sira nia fiar nu’udar fini domin nian.

Iha konsiliu vatikanuy II afirma nune’e: Kristu sempre prezente iha igreja iha komunidade liu liu iha selebrasaun liturjia Eucaristia tamba liu husi Eukaristia mak maneira espesial hodi revela ninia domin ba ita tan nee mai ita haksolok nafatin unifika ita an ho Aman  Maromak, ho igreja, ho sarani sira. Laiha ema mak hapara Maromak nia domin nunee ho Jesus ne’ebé sa’e ba lalehan fo hanoin mai ita atu husik ita nian an sai ida deit ho Aman Maromak.

 

Reflesaun Husi: Irmã Lucia do Carmo, OP