HAU MAI LA’OS ATU IMI SERBI HAU, MAIBE ATU HA’U SERBI IMI

 DOMINGO XXV TEMPU BAIBAIN

1a. leitura: Sa. 2:12,17-20

2a. Leitura: Tgo. 3:16-4:3

Evangelho: Mk. 9:30-37

Nudar saseluk Kristo nian, ita hotu-hotu iha knar atu moris no banati tuir Jesus nia lalaok nebee husik hela mai ita. Lao tuir dalan Jesus nian significa katak lao no banati tuir lalaok ou ejemplo sira hotu ne’ebé Nia hatudu mai ita; hanesan iha Evangelhp ohin nian hateten nune’e: Hau mai laos atu imi serbi hau, maibe atu hau serbi imi.

Mundo ohin loron, ema hadau malu atu compete hodi sai ukun na’in ne’e barak no facil, maibe deficil atu halo an sai atan hodi servi povo no sarani ne’e ho fuan. Attitude nune’e susar boot iha tempo ohin loron. Basá ema hotu tama iha grupo, partido no congregação uluk nanain atu hetan saida mak nia hakarak, hanesan: atu ema hahi, adora, servi no respeito, la’os atu tuir saida mak grupo, partido no congregação nia principio sira.

Evangelho ohin nian lori ita atu reflete kona ba ita nia moris liu-liu hanesan nudar consagrada ida, hau nia kna’ar lolos mak saida? Benefisio sa mak hau hetan husi misaun sira ne’ebé hau halao? Hau nia serbi hotu nebe’e durante nee, hau halao ho intensaun atu ema hahi no gaba hau ka ou hau halo tamba hau hakarak duni ho fuan atu serbi hau maluk sira?

Maromak bolu ita ida idak no fo mai ita responsabilidade atu serbi malu.   Wainhira Jesus koalia ka hanorin kona ba nia an katak nia sei hetan: “tarata, baku hodi terus to’o mate” (Mc.9:31), maibe Jesus nia escolante sira hanoin hela buat seluk. Hodi hadau malu hela fatin no posição.  Ho ida ne’e Jesus husu ba sira: “imi haksesuk malu kona ba saida iha dalan?” (Mc. 9:33). Sira nia intenção haksesuk malu iha dalan kona ba se mak boot liu wainhira Jesus mate, sira começa prepara estrategia atu hadau malu kadeira no ukun. Husi sira nia intenção nebe la tuir Cristo nia hakarak mak Jesus dehan hikas ba sira: “se mak hakarak sai boot liu sira seluk nia sei sai ikus liu hotu, nia sei sai hotu-hotu nia atan” (Mc.9:35). Husi Jesus nia liafuan ne’e atu hateten katak: hakarak sai ukun na’in precisa halo-an sai ki’ik hodi hamamuk an atu bele hatene rona no hadomi ema hotu.

Papa Francisco, wainhira hasoru malu ho Bispo, Nailulik, madres, frater no catequista sira iha Catedral fo hanoin mai ita dehan: “imi tenke sai perfume ka mina morin Cristo nian ba ema seluk”. Papa nia mensagem ne’e convida no fanun ita idak-idak nia fuan no ulun atu hanoin hikas wainhira Nai bolu ita iha Nia missão, liu husi modelo inan ida nian iha ita nia congregação. Husi ne’e, ita bele comprende Jesus Cristo nia missão iha mundo. Nia mai la’os deit tamba ema riku sira, maibe ba ema kiak no mukit sira no mos Nia mai ba ema hotu atu hetan salvação.

Cristo bolu ita hotu no haruka atu sai nia manu-ain mina morin nian ba ema seluk iha ita ida-idak nia moris no missão. Mai ita tuir no aprende buat hotu husi Nia. Basa hatudu liu husi nia Nia liafuan no Nia hahalok rasik. Nune’e mos visita Santo Padre Francisco nian iha Timor no celebra missa iha Tasi tolu nia dehan: “Hau hare riku soin Timor nian la’os ai-kameli maibe ninia povo”. Nune’e povo ka sarani ne’e mak diak liu. Ne’e duni, Nai Jesus hakarak atu hanorin ita consagrada no fiar na’in sira:

1. Hatene simu terus, hanesan Nia simu: “Jesus dehan se mak hakarak tuir Hau sei hakriit nia an rasik, sei simu nia kruz hodi la’o tuir Ha’u” (Mc. 8:34)

2. Sai ukun na’in ho fuan la’os ho liafuan. Hanesan Nia halo: “La iha domin ida ne’ebé boot liu ida nebe saran nia moris tan nia belun sira (Jo. 15:13).  

3. Atu sai ukun nain diak significa sai atan:Hau mai la’os atu imi servi ha’u maibe atu servi imi (Mt.20:28). Amen.

Ita harohan atu ho grasa Nai ninian, ita hotu bele aten brani nafatin atu lao ba oin hodi descobre liu tan saida mak Maromak nia hakarak mai ita.

 

Bom Domingo ba ita hotu!

 

Reflesaun Husi:

Irmã Leonarda Da C. Evangelista, OP

Kontinua Le'e

ITA BOOT MAK MESSIAS

 DOMINGO XXIV TEMPU BAIBAIN

 

1a. Leitura: Isa. 50:5-9a

2a. Leitura: Tgo.  2:14-18

Evangelho: Mk. 8:27-35

 

Nudar Timor oan ita agradese no kontenti tebes ho Amu Papa nia visita foin dadaun ne, maski nasaun ida kiik tebes iha mundo maibe riku iha kultura, valores moris, no identidade rasik hanesan Timor oan ida. Hanesan iha lema ba vizita Amu Papa nian: atu imi nia fiar sai imi nia kultura. Cultura ida hatene tau  matan no hadomi malu. 

      Iha Evangelhu Saun Markus haktuir katak Jesus husu  ba Nia discípulos sira kona ba Nia ne se? no Pedro responde katak, "Ita mak Kristu/ Mesias.” Iha ne'e  ajuda ita nia fiar no fortalece ita nia identidade de forma importante atu comprende liu signifikado  husi pergunta sira ne:

Premeiro:Conhecimento kona ba An rasik: Iha momentu Jesus pergunta "Nia an ba sira ?", hatudu mai ita atu reexamina ita nian identidade no ajuda ita atu kompriende mais sobre ita nia valores no prinsipiu sira.

Segundo: Aceitação do Chamado: Jesus explica kona nia nian missão. Atu tuir Jesus, ita simu bolu ida ne’e hodi moris tuir hanesan Nia ka lae? Ne'e fortalece ita nia identidade, no ajuda ita atu senta-se parte importante iha plano Divinu.

Terceiro Supera ita nia tauk sira: Iha ne'e, ita aprende katak enfrenta desafios no sufrimentu oi-oin la significa lakon ita nia identidade, maibé mós fo hanoin mai ita faze importante ida ne’e. Iha momentus difíceis, ita hakarak atu buka no lembra katak Jesus mos hasoru dificuldades.

Quarto: Moris ho Propósito: Ne'e ajuda ita atu determina saida mak importante iha ita nia moris, no hili no reflete ita nia identidade iha Kristu.

Quinto:Comunidade no Apoio: Iha seguimento, ita la’os mesak no ita sei la la’o mesak. Ita nian comunidade, familia, no amigos sira bele apoia ita iha caminhada ida ne’e. Ajuda malu nune’e ita bele fortalece ita nian identidade coletiva iha  Kristo.

 

Reflesaun Husi: Irmã Berta Soares Moniz, OP

 

Kontinua Le'e

RONA DIDIAK BA: NA'I HALO BUAT HOTU MESAK DIAK

 DOMINGO XXIII TEMPU BAI-BAIN

 

1a. Leitura: Isa. 35:4-7a

2a. Leitura: Tg. 2:1-5

Evangelho: Mk. 7:31-37 

Ema Timor quase hot-hotu prepara ona fuan atu simu ho ksolok Santo Padre Francisco iha rai doben Timor Leste. Santo Padre hanesan representante Kristu nian mai vizita ita atu lori lia fuan ksolok Evangelho nian. Ita nia tilun nakloke atu rona ka lae?

Desde que Sua Santidade to’o iha Indonesia, Ita barak asiste katak  sarani barak,  muçulmano sira inclui sira ne’ebé  la fiar iha Jesus hetan inspirasaun ho ejemplo moris Papa Francisco nian. Nia ema ne’ebé simples, hakbesik no hakuak ema hotu, liu-liu nia hatudu katak paz iha mundo ne’e possivel sei ita hatene simu malu mesmu que ita iha diferencia oi-oin. Ita ida deit mesmu que ita diferentes. Ita hotu pertence ba humanidade. Ita nia tilun moos no diak hela atu rona didiak ka lae?

 Iha Evangelho ohin nian, Saun Markus haktuir katak wainhira Jesus sai husi rai Tiro, hodi la’o husi rai Sidonia ba tasi Galilea, Nia kura Iha ema ida tilun diuk no monok ne’ebé sira lori ba Nia. Jesus dehan ba Nia “ Effatha” katak” Loke ba.”

Iha mundo nakonu ho barulho oi-oin, dala barak kusta ba ita atu rona didiak. Tan ita la rona didiak, deficil mos ba ita atu koalia liafuan diak. Dala ruma mos ita rona maibe ita rona lian sira ne’ebé lori atu atu hadook an husi Jesus.

Hanesan Jesus, Papa Francisco sai husi Vatikanu, mai Indonesia, liu husi Papua Nova Guiné, sei mai to’o rai doben Timor Loro Sa’e, no sei liu ba Singapura. Hein katak ho Ita nia Papa nia prejensa, ita nia tilun bele nakloke no nanal mamar hodi haklaken: katak” Nai halo buat hotu  mesak diak.” Ida ne’e mak atu dehan katak: atu o nia fiar sai o nia cultura.

Ita husu Jesus atu kura ita nia moras sira hanesan ladun gosta rona malu, hakarak buka manan deit, la rona ba kiak sira nia halerik, oan sira la rona inan aman, inan aman la fo tempu atu rona oan sira, no lakohi simu saida mak diferente husi ita, nst.

Wainhira ita nia tilun sira nia fuan taka hela, mesmu ita hare hela iha ita nia rain iha injustisa oi-oin, ita nanal sei to’os atu koalia no defende ema seluk nia direito ba moris diak.

Ita hotu nia deseju atu depois de Papa Francisco nia vizita, ita nia rain no kreda sei iha transformasaun no iha moris foun. Moris foun ida ne’e la precisa ejiji husi ema seluk maibe tenki comesa husi ita a’an rasik.

Portanto, loke tilun no fuan atu simu grasa Na’I Maromak nian no hahu moris tuir cultura Evangelho nian. Atu Ita nia rain bele iha paz, hatene dialogu, rona, simu, no respeita malu, serbisu hamutuk ba Timor ida diak liu tan. Liu-liu tane a’as dignidade humana iha ita nia rain.  

HI’IT AN MAI AMI RAI DOBEN TIMOR LESTE SUA SANTIDADE PAPA FRANCISCO. 

AMI HAKSOLOK HO ITA NIA PREJENSA!

 

Reflesaun Husi: Irmã Maria de Fatima Pui, OP

Kontinua Le'e

EXPERIENCIA MILAGRE 5+2=5000

 DOMINGO BA DALA XVII TEMPU BAI BAIN

1a. Leitura  Rs 4.42-44

2a. Leitura:  Ef 4.1-6

Evangelho:  Jo 6.1-15

 

Ita iha ona experencia milagre iha ita nia moris? Simbolu 5+2= 50000 bolu  atensaun  mai hau no halo hau hakfodak kona ba paun  fuan lima no ikan  rua bele fo han ba ema barak no oi oin deit  ne’ebé buka no hakarak tuir Jesus.  Ba hau ida ne’e milagre boot ida ne’ebé acontece no dala barak ho ita nia hanoin ema nian deit ita sei la kumprende.

 Ohin ita rona iha Evangelho S.  Joao 5+2 laos 7 maibe 5000, la’os matematika ne’ébe hanorin iha eskola  maibe Nai Jesus rasik nia laran luak no laran sadia  fahe paun  moris  ne’ebé tun husi lalehan halo milagre ida ne’e hodi hatudu  Maromak nia kbiit ba ema  mukit sira. Paun fuan lima no ikan rua hodi hatudu Maromak nia domin ba ema mukit sira ne’ebé buka Maromak.

Iha primeria leitura  haktuir mos kona ba profeta Isaias  ne’ebé Maromak haruka atu konvida ema hotu ba nia, ema hotu ne’ebé hamrok  mai hemu ba husi we matan tamba Maromak mak we matan moris,ita hotu hetan ksolok rohan laek. .Elizeu bolu ema sira ne’e  basá Maromak dehan sira sei han too bosu no naresin,ema sira nee han duni too naresin.

Iha segunda leitura Saun Paulo iha  nia karta ba sarani sira iha Efeso mos hafanun ita atu rona kona ba ita nia fiar ba Maromak nia domin ida ne’ebé ita labele sukat. Lia fuan sira nee nakonu  ho esperansa ne’ebé sei hakaas an  atu moris  ho neon ida deit iha dame laran.

Jesus nia milagre ida  nee hatudu Maromak nia kbit ba ema kbit laek sira. Jesus fo han ema sira nee la sukat ou la fo pas pas deit  maibe nia fo han ema rihun lima nee la sura feto no labarik. Apostolu sira hanoin barak oinsa atu fo han ema lubun bo’ot ne’e maibe sira haluha katak Jesus hamutuk hela ho sira.

Milagre acontese lor-loron iha ita nia moris maibe dala barak ita hanesan apostulo sira, matan, tilun, no fuan taka hela. Nune’e, Ita la bele hare buat furak barak ne’ebé Na’I Maromak halo ona mai ita. Fiar deit, milagre se’I mosu.

 

     Irmã Sabina Gonzaga,OP

Kontinua Le'e

"IMI MAI, ITA LA'O MESAK BA FATIN IDA, ATU TUR HALIMAR UITOAN"

                                                      DOMINGO XVI TEMPO COMUM 

1a. Leitura: 23, 1 - 6

2a.  Leitura: Ef. 2, 13 - 18

Evangelho: Mc. 6, 30-34

 

Ohin ita tama ona ba Domingo sanulu resin neen tempu bai-bain nian. Leitura tolu ne’ebé mak ita lee no reflete mesak furak no mesak kmook hodi kontinua transforma ita nia-an nudar ema fiar nain.

Evangelho ohin nian kontinuasaun ho Evangelho domingo kotuk koalia kona ba Jesus bolu Nia Apóstolo sira nain sanulu resin rua, hodi haruka sira na'in rua-rua ba hanorin ema. Nia haraik mós ba sira kbi'it atu ukunespiritu foer sira.

Wainhira Apóstolo sira  fila fali husi missaun ne’ebé sira halao, sira haktuir sai ba Nia buat hotu sira halo no hanorin. Liu husi missaun ne’ebé mak Jesus ho nia Apóstolo sira halo la fasil nakonu ho sakrifisio maibe sempre halo ho domin ba humanidade tomak.

Liafuan diak Jesus nian hanorin mai ita oinsa atu hatene ema seluk nia presiza iha kompaisaun hanesan Jesus laiha tempu atu deskansa tamba ema barak buka nafatin Nia. Jesus hanoin tebes ema sira ne'e, basá, sira hanesan bibi sira ne’ebé bibi-atan laek.

Jesus dehan ba nia Apóstolo sira atu deskansa uitoan buka fatin hakmatek atu bele reza ka kontaktu ho Maromak. Iha ita nia moris dala ruma ita ho preokupasaun barak dala ruma stress, dala ruma kole, dala ruma mos ita nia serbisu sira la hetan suçessu ida ne'e atu mai ita katak, ne'e tamba dala barak ita laiha tempu ba Maromak ne mak nia moris sai mijerable.

Nee duni liu husi reflesaun badak ida ne'e hau konvida ita tau nafatin Jesus mak sai centru iha ita nia moris.Buka nafatin tempu atu haforsa relasaun ho Nia tamba iha Nia mak ita hetan hakmatek no ksolok.

 

Reflesaun husi: Irmã Maria de Fátima Sequeira,OP

Kontinua Le'e

“HARUKA NAIN RUA-RUA HO KBI’IT ATU DUNI SAI ESPIRITU FOER SIRA.”

 DOMINGO XV DO TEMPO COMMUN

1a. Leitura: Am.7: 12-15

2a. Leitura: Ef. 1: 3-10

Evangelho:  MC 6:7-13

Domingo  xv tempo commun nian, leituras no Evangelho ohin nian  konvida ita  atu reflete didiak kona ba ita ida-idak nia esperensia  ne’ebé Maromak bolu ita hanesan  Nai Jesus bolu  nia  apostolu nain 12, mai ita  iha momentu furak sira ne’ebé liu ona  no oin  sa mak ita hatan ho sentementu  ba bolu ne’e iha ita ida-idak nia fatin, ita balun prontu no karik ita balun la prontu iha tempo neba ,maibe Maromak nunka see husik ita mesak tanba nia fihir ona ita desde hori uluk kedas desde wainhira ita sei iha ita inan nia knotak .

Hanesan saun Paulo fo hanoin  mai ita ne’ebé moris  iha  vida consagrada  vokasaun nee graça ida, nebe ita simu hosi Maromak  ho bensaun oin-oin, liu hosi matenek ho talentu ne’ebé ita iha, katak Maromak  iha ona planu ba ita hodi  haruka ita  ba iha fatin nebe ema presija, hanesan Jesus hili nia apostolu sira nain rua-rua hodi fo kbi’it ba sira atu duni sai espiritu foer sira e saida mak apostolu sira halo? sira  rona hodi halo tuir saida  mak Jesus haruka sira atu halo,hahalok diak apostolu sira nian nemak presija ita atu tau iha pratika nudar missionaria diak ida, katak la hili fatin nebe diak deit ba hau atu ba tanba buat hotu-hotu iha maibe ita mos presija moris tuir saida mak hakerek ona iha ita nia carisma katak :”ba iha fatin ne’ebé ema kiak sira presija  no koko moris ne’ebé sira moris ba.”

Dala ruma mos ita sai disobedece ba ita nia kna’ar sira ne’ebé haruka ita ba no halo tanba ho situasaun nebe la apar ho ita nia moris ita rejeita tanba deit la bele adapta maibe ida nee laos kestaun bot ida ba ita, nudar missionaria ida ita mos presija actua hanesan profeta Amos katak nia rona ba Maromak ne’ebé haruka nia atu ba no sai ema naduina ida hodi moris iha povu Israel nia le’et, tanba profeta Amos fiel ba Maromak nia liafuan nebe nia rona 

.Nune’e mos ita presija aprende hosi profeta sira nebe kari hela fini fiar nian  ba ita, tanba ita ema la perfeito dala ruma ita monu ho ita nia fiar rasik,tanba ita larona ho didiak Maromak nia liafuan sira nebe koalia mai ita,maibe dalan ba ita mak nee see ita lao sala dalan karik buka atu hanoin nafatin maromak nebe bolu ita,  tanba maromak nunka see husik ita mesak.

Nia sempre kuida ita, iha situasaun saida deit mak ita hasoru maske ita lafiel ba Maromak maibe Nia sempre fiel ba ita,  hodi hein ita atu fila fali ba Nia, no hili ita atu tuir nafatin Jesus nia ain fatin,

                                                                       BY:  IRMÃ ZELIA DOS REIS NUNES, OP

Kontinua Le'e

Sai Testemunho Diak ba Maromak nia Reino

 Domingo XIV do Tempo Comum

1a. Leitura: Ezequiel 2: 2-5

2a. Leitura: 2 Coríntios 12: 7-10

Evangelho: Marcos 6: 1-6

 

            Iha mundo ohin loron desafio boot ida ita hasoru mak atu sai sasin ba ita nia fiar. Oinsa ita fiar nain sira moris tuir saida mak ita fiar liu-liu atu sai profeta. Profeta mak ema ida ne’ebé koalia lialos Maromak nian ba ema seluk. Koalia no moris tuir lialos. Maibe desafios sira ne’e fo hanoin mai ita atu loron ba loron haka’as an no husu nafatin Na’I nia graça atu nune’e ita bele moris lolos tuir Na’I Maromak nia hakarak.

Liturjia iha Domingo XIV tempu komun ne’e  convida ita atu reflete konaba misaun profética, konfia iha Na’i Maromak wainhira hasoru dificuldade e aseita Na’I Maromak nia liafuan iha ita nia moris lor-loron. 

Leitura dahuluk hosi livro profeta Ezequiel nian, hatudu mai ita konaba oinsa Maromak bolu Ezequiel. Na’i Maromak haruka profeta ba nasaun rebelde ida, ba povo ida ne’ebé fuan toos tebes. Maske profeta ema rejeita, maibe Ezequiel kontinua koalia konaba lia-los hosi Maromak. Situação ida ne’e hanorin sarani sira atu kontinua haklaken lias los kona ba Maromak nian maske hasoru ambiente difícil no indiferente. São Paulo, nia karta ba sarani Coríntios iha leitura daruak, koalia konaba ninia fraquezas rasik e do “espinho na carne” nebe sosa bebeik nian. Paulo reconhece katak iha ninia fraqueza mak Maromak hatudu ninia graça (2 Cor 12,10). Iha evangelho São Marcos, ita haré Jesus fila ba nia rain rasik no oinsa mak nia emar rasik la simu Nia. Jesus nia ema rasik lakohi fiar tanba hatene katak nia mai hosi família humilde. Situação ida ne’e bolu ita nia atensaun atu oinsa mak ita au néon ba Maromak nia Liafuan ne’ebe Jeus mai haklaken. Dala barak mak ema labele simu Maromak nia liafuan tanba iha prekonseito oi-oin ba ema seluk.

Realiadade ohin loron hatudu momos katak atu koalia lialos ita precisa iha coragen tan ema sei rejeita ita no sei la gosta ita maibe Maromak continua bolu ema hotu atu sai profeta ne’ebé laran mos, sai testemunha ba Maromak nia reino, laran metin deit ba Maromak nia vontade. Ho nune’e mak Maromak bele hatudu nia graça iha ita ema nia fraqueza.

 

Reflesaun Husi: Irmã Alda Baptista de Carvalho Soares, OP

Kontinua Le'e

BUKA TEMPU BA SILENCIO NO HAKMATEK

 

DOMINGO BA DALA SANULU RESIN RUA TEMPU BAIBAIN

1a. Leitura: Job 38:1, 8:11

2a. Leitura: 2 Cor. 5:14-17

Evangelho: Mk. 4:35-42

Iha mundo agitado ida, ema barak haluha tempu precioso ida ne’e. Tempu ida atu descansa, relax no reflete kona ba moris no husu ba  an tansa laiha tempu atu hakamtek? Ita bele husu ita nia an, no meio da ita nia preocupação sira, sei hetan tempu atu hakmatek no tranquil@s?

Iha causas oi-oin husi ita nia tauk no ansiedade sira ; quando ita hasoru situações sira ne’e, ita lakon concentração no sai desorientad@s.

Iha Evangelho  S. Marcos 4:35-41,  evangelista ne’e  conta  história  kona ba Jesus ho nia  discípulos  ne’ebé hakur ba tasi sorin ho barco ida. No entanto, sira hasoru laloran no anin boot iha tasi klaran.  Discípulos sira hakfodak tebes;  Jesus hamutuk ho sira maibe Nia toba hela. Sira fanu nia no Jesus haksiak anin no dehan ba tasi HAKMATEK BA!

Ita la admira katak no meio da turbulência tasi nian, Jesus sei bele toba? Ita bele hare ba ita nia  experiências: será que ita bele  toba quando ita enfrenta lutas, dificuldades, perigos no moras?  Dala barak ita la consege toba diak tan ita tauk no causa husi ita nia tauk mak falta de confiança..

   Jesus fo hanoin mai ita dala ida tan atu buka tempu atu hakmatek no nonok atu pasa tempu ho Nia iha silencio nia laran atu nune’e ita bele goza no fo saborear Ninia companhia.

Nune’e ita bele reforça ita nia relação ho Nia no aumenta ita nia confiança iha Nia.  Confia iha Nia, keta tauk! Nia mak fonte única de força no encorajamento iha ita nia  jornada hanesan ninia  discípul@s.

Reflesaun Husi: Irmã Maria de Fatima Pui, OP

 

 

Kontinua Le'e

KARI HELA FINI NO HEIN TO’O NIA BURAS NO FO FUAN

 

DOMINGO SANULU RESIN IDA TEMPU BAIBAIN

1a. Leitura: Ez. 17:22-24

2a. Leitura: 2 Cor. 5:6-10

Evanjelho: 4:26-34

      Reflete kona ba Evanjelho Saun Markus 4:26-34, hau kumprende kedas kona ba Aiknanoik  ne’ebé Jesus koalia no compara Reino Maromak nian hanesan ema ida  ne’ebé kari hela fini iha rai.

    Moris husi familia  agricultor, hau hatene didiak oinsa atu kari fini no hein to’o fini ne’e moris sai buras no fo fuan.

   Reino Maromak nian bele compara ho Ita nia moris. Moris ida ne’e hanesan processo ida oinsa kari fini  ida to’o nia sai bo’ot no sei fo fuan .

   Uluk knanain, prepara rai, kari fini, atu fini ne’e moris diak precisa iha loro matan no be’e. Ita tempu balun precisa fokit du’ut no hein   ba milagre moris nian .

    Fini sei moris no buras rasik, ita precisa hein ho entusiasmo no paciensia, tau matan didiak, matan moris, iha coragem liu liu iha fiar no esperanza nafatin.

    Sei coeltha diak agradese, sei ladun diak agradese mos, aprende liu tan husi esperensia atu bele  hetan resultade diak liu tan iha tempu oin mai.

   Maomak mak author ba ita nia moris. Ita  tenki coopera ho moris ne’e  no husik Ninia Espiritu serbisu iha ita nia moris lor-loron.

   Hanesan fiar nain, ita continua kuda fini fiar, esperança, perdaõ, ksolok, dame, no justisa. Ita precisa kari fini Evanjelho nian no husik fini ida ne’e fo fuan.

    Ninia fuan ita sei hare iha cuialidade moris lor-loron nian. Jesus husu atu atu fo fuan, no fuan ne’ebé rohan laek.

 

Reflesaun Husi:  Irmã Maria de Fatima Pui, OP

 

 

 

 

Kontinua Le'e